തിരുവനന്തപുരം:പ്രേമാഭ്യര്ഥന നിരസിച്ച വീട്ടമ്മയെ താമസസ്ഥലത്തു ചെന്ന് കൊല്ലാന് ശ്രമിച്ച യുവാവ് പിടിയിലായി.മണക്കാട് എംഎസ്കെ നഗര് സ്വദേശി അക്ഷയ് ജിത്ത്(26) ആണ് തുമ്പ പൊലീസിന്റെ പിടിയിലായത്.
കൊറിയര് സര്വീസ് ജീവനക്കാരനാണ് ഇയാള്.കൊറിയര് നല്കാനെത്തി പരിചയപ്പെട്ട വീട്ടമ്മയോടാണ് യുവാവ് പ്രണയാഭ്യര്ത്ഥന നടത്തിയത്.വിവാഹിതയാണെന്നറിഞ്ഞിട്ടും ശല്യം തുടര്ന്നു. വീട്ടമ്മയെ രണ്ട് വര്ഷം മുമ്പാണ് പ്രതി പരിചയപ്പെടുന്നത്. പിന്നാലെ നിരന്തരം ഫോണ് ചെയ്യുകയും സന്ദേശങ്ങള് അയയ്ക്കുകയും ചെയ്തിരുന്നു.
പല തവണ യുവതിയോട് പ്രേമാഭ്യര്ഥന നടത്തി. ഇവര് പ്രേമാഭ്യര്ഥന നിരസിച്ചതിനെത്തുടര്ന്നാണ് കൊല്ലുമെന്ന് ഭീഷണിപ്പെടുത്തിയത്. കഴിഞ്ഞ ദിവസം കൊല്ലുമെന്ന് മെസേജ് അയച്ച ശേഷം ഇയാള് വീട്ടമ്മയുടെ വീടിന് സമീപത്തെത്തി. ഉച്ചയോടെ എത്തിയ പ്രതി വീട്ടമ്മയെ അക്രമിക്കാന് ശ്രമിച്ചെന്നും കുതറിമാറിയ ഇവരെ കഴുത്ത് ഞെരിച്ച് കൊല്ലാന് ശ്രമിച്ചെന്നും പരാതിയില് പറയുന്നു. യുവതിയുടെ നിലവിളി കേട്ട് സമീപത്തുള്ളവര് എത്തുമ്പോഴേക്കും പ്രതി രക്ഷപ്പെട്ടു.
പിന്നാലെ ഇവര് തുമ്പ പൊലീസില് പരാതിപ്പെട്ടു. ഇതോടെയാണ് പൊലീസ് യുവാവിനെ അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. ഇയാള്ക്കെതിരെ നേരത്തെയും സമാനമായ പരാതികള് ഉണ്ടായിട്ടുണ്ടെന്ന് പൊലീസ് പറഞ്ഞു.
