പത്തനംതിട്ട : അച്ചടക്ക ലംഘനം ആരോപിച്ച് ആറന്മുള സ്റ്റേഷനിലെ സീനിയര് സിവില് പൊലീസ് ഓഫീസര് ഉമേഷ് വള്ളിക്കുന്നിനെ സര്വീസില് നിന്ന് പിരിച്ചുവിട്ട് പത്തനംതിട്ട ജില്ലാ പൊലീസ് മേധാവി ആനന്ദ് ഉത്തരവായി. 18 മാസമായി സസ്പെന്ഷനിലായിരുന്നു ഇദ്ദേഹം. ഉത്തരവിനെതിരെ ട്രൈബ്യൂണലിനെ സമീപിക്കുമെന്ന് ഉമേഷ് പറഞ്ഞു.
ഉമേഷ് 11 തവണ വകുപ്പുതല അച്ചടക്ക നടപടി നേരിട്ടിട്ടുണ്ടെന്ന് പിരിച്ചുവിട്ടു കൊണ്ടുള്ള ഉത്തരവില് വ്യക്തമാക്കുന്നു. സര്വീസിലിരിക്കുമ്പോഴും സസ്പെന്ഷനിലിരിക്കുമ്പോഴും ഉമേഷിന്റെ ഭാഗത്ത് നിന്ന് ഗുരുതരമായ അച്ചടക്ക ലംഘനങ്ങള് ഉണ്ടായി. മേലുദ്യോഗസ്ഥരെയും പൊലീസ് സേനയെയും അപകീര്ത്തിപ്പെടുത്തുന്ന തരത്തില് എട്ട് തവണ സമൂഹ മാധ്യമങ്ങളില് പോസ്റ്റുകള് ഇട്ടു, അച്ചടക്ക ലംഘനത്തിന് വിശദീകരണം ചോദിച്ചപ്പോള് മേലുദ്യോഗസ്ഥരെ പരിഹസിക്കുന്ന രീതിയിലുള്ള മറുപടികള് നല്കി. അവ സമൂഹ മാധ്യമങ്ങളില് പ്രചരിപ്പിച്ചുവെന്നും ഉത്തരവില് ചൂണ്ടിക്കാട്ടുന്നു.
