കണ്ണൂര്: പയ്യന്നൂര് രാമന്തളിയില് ഒരു കുടുംബത്തിലെ നാല് പേര് മരിച്ച സംഭവത്തില് കുട്ടികള് വിഷം ഉള്ളില് ചെന്നാണ് മരിച്ചതെന്ന് പ്രാഥമിക പോസ്റ്റ്മോര്ട്ടം റിപ്പോര്ട്ട്.അഞ്ച് വയസുകാരി ഹിമ, രണ്ട് വയസുള്ള കണ്ണന് എന്നിവരാണ് മരിച്ചത്.കഴിഞ്ഞ ദിവസമാണ് അമ്മയും മകനും കൊച്ചുമക്കളും അടക്കം നാല് പേരെ വീട്ടില് മരിച്ച നിലയില് കണ്ടെത്തിയത്.
രാമന്തളി സെന്റര് വടക്കുമ്പാട് റോഡിന് സമീപം താമസിക്കുന്ന കൊയിത്തട്ട താഴത്തെ വീട്ടില് ഉഷ (60), മകന് പാചക തൊഴിലാളി കലാധരന് (36), കലാധരന്റെ മക്കളായ ഹിമ, കണ്ണന് എന്നിവരെയാണ് വീട്ടിനുള്ളില് മരിച്ചനിലയില് കണ്ടെത്തിയത്.
കലാധരനും ഭാര്യയും തമ്മില് കുടുംബകോടതിയില് കേസ് നിലവിലുണ്ട്. കലാധരന്റെ കൂടെ താമസിക്കുന്ന രണ്ടുമക്കളെയും അമ്മയ്ക്കൊപ്പം വിടാന് കോടതി വിധിച്ചിരുന്നു. തിങ്കളാഴ്ച രാത്രി കലാധരനെ വിളിച്ച് കുട്ടികളെ വിട്ടുനല്കണമെന്ന് ഭാര്യ ആവശ്യപ്പെട്ടിരുന്നു. പിന്നാലെയാണ് നാല് പേരെയും മരിച്ച നിലയില് കണ്ടെത്തിയത്.കുട്ടികള്ക്ക് വിഷം നല്കിയ ശേഷം കലാധരനും അമ്മയും ജീവനൊടുക്കുകയായിരുന്നു എന്നാണ് നിഗമനം.
അസ്വാഭാവിക മരണത്തിന് പൊലീസ് കേസെടുത്തു. വീട്ടില് നിന്നും ആത്മഹത്യാക്കുറിപ്പ് കണ്ടെത്തിയിട്ടുണ്ട്.
