ന്യൂദല്ഹി: സ്കൂള് വിദ്യാഭ്യാസത്തില് നൂതന സാങ്കേതികവിദ്യ സംയോജിപ്പിക്കുന്നതിനുള്ള പ്രധാന ചുവടുവയ്പ്പില് 11, 12 ക്ലാസുകളിലെ വിദ്യാര്ത്ഥികള്ക്കായി നിര്മിതബുദ്ധി സംബന്ധിച്ച സിലബസുകളും പാഠപുസ്തകങ്ങളും രൂപകല്പന ചെയ്യുന്നതിനായി നാഷണല് കൗണ്സില് ഓഫ് എജ്യൂക്കേഷന് റിസര്ച്ച് ആന്ഡ് ട്രെയിനിങ് (എന്സിഇആര്ടി) പാഠപുസ്തക വികസന സംഘത്തെ രൂപീകരിച്ചതായി വിദ്യാഭ്യസ മന്ത്രാലയം പാര്ലമെന്റിനെ അറിയിച്ചു.
ദേശീയ വിദ്യാഭ്യാസനയം(എന്ഇപി) 2020, സ്കൂള് വിദ്യാഭ്യാസത്തിനായുള്ള ദേശീയ പാഠ്യപദ്ധതി ചട്ടക്കൂട് എന്എസ്എഫ്-എസ്ഇ) 2023, എന്നിവ നടപ്പിലാക്കുന്നതിന്റെ ഭാഗമായാണ് ഈ സംരംഭമെന്ന് മന്ത്രാലയം വ്യക്തമാക്കി. അതിവേഗം വികസിച്ചുകൊണ്ടിരിക്കുന്ന ഡിജിറ്റല് സമ്പദ് വ്യവസ്ഥയ്ക്ക് ആവശ്യമായ നൂതന എഐ, കമ്പ്യൂട്ടേഷന് ചിന്താശേഷി എന്നിവ ഉപയോഗിച്ച് സീനിയര് സെക്കന്ഡറി വിദ്യാര്ത്ഥികളെ സജ്ജരാക്കുക എന്നതാണ് ഈ നീക്കത്തിന്റെ ലക്ഷ്യം. മുതിര്ന്ന ക്ലാസുകള്ക്ക് പുറമേ, ആറാം ക്ലാസിലെ തൊഴിലധിഷ്ഠിത വിദ്യാഭ്യാസ പുസ്തകത്തില് ആനിമേഷനും ഗെയിമുകളും സംബന്ധിച്ച എഐ അധിഷ്ഠിത പ്രോജക്ടും എന്സിഇആര്ടി അവതരിപ്പിച്ചിട്ടുണ്ട്. എഐ ഉപകരണങ്ങളുടെ ഉപയോഗം ഈ പദ്ധതിയില് ഉള്പ്പെടുന്നു. കൂടാതെ അനുഭവ പഠനത്തിലൂടെ നിര്മിത ബുദ്ധിയുടെ പ്രായോഗിക ഘട്ടങ്ങള് വിദ്യാര്ത്ഥികളെ പരിചയപ്പെടുത്താനാണ് ഇവ രൂപകല്പന ചെയ്തിരിക്കുന്നത്. 2026-27 അദ്ധ്യയന വര്ഷത്തില് മൂന്നാം ക്ലാസുമുതല് എല്ലാ സ്കൂളുകളിലും ഇവ പ്രാബല്യത്തില് വരുമെന്നും സര്ക്കാര് പറയുന്നു. ഈ നടപടികളിലൂടെ ഭാരതത്തിലെ അധ്യാപകരും വിദ്യാര്ത്ഥികളും സാങ്കേതിക വിദ്യാധിഷ്ടിത ഭാവിയുടെ ആവശ്യങ്ങള്ക്കായി സജ്ജരാകുകയും രാജ്യത്ത് ഡിജിറ്റല് വളര്ച്ച ഉറപ്പാക്കുകയും ചെയ്യുക എന്നതാണ് സര്ക്കാരിന്റെ ലക്ഷ്യം.
