മുംബൈ: മഹാരാഷ്ട്ര തദ്ദേശ സ്വയംഭരണ തെരഞ്ഞെടുപ്പില് ബിജെപി-എന്സിപി-ശിവസേന ഉള്പ്പെടുന്ന മഹായുതി മുന്നണി നേടിയ തിളക്കമാര്ന്ന വിജയം വെറും ട്രെയ് ലര് മാത്രമാണെന്നും ജനവരി 15ന് നടക്കുന്ന മുംബൈ മുനിസിപ്പല് കോര്പറേഷന് തെരഞ്ഞെടുപ്പിലും ഈ വിജയം ആവര്ത്തിക്കുമെന്നും മുഖ്യമന്ത്രി ദേവേന്ദ്ര ഫഡ് നാവിസ്.
ആകെയുള്ള 288 മുനിസിപ്പല് കൗണ്സിലുകളില് 215 ഇടത്തും മഹായുതി മുന്നണി വിജയിച്ചു. ഇതില് ബിജെപി ഏറ്റവും വലിയ ഒറ്റകക്ഷിയായി മാറി. ആകെ 129 മുനിസിപ്പല് കൗണ്സിലുകള് ബിജെപി പിടിച്ചു. ഇത് ബിജെപിയുടെ വന് വിജയമാണ്. 2017ല് തദ്ദേശസ്വയംഭരണ തെരഞ്ഞെടുപ്പില് ബിജെപി ജയിച്ചത് 95 മുനിസിപ്പല് കൗണ്സിലുകള് മാത്രമാണ്. – ദേവേന്ദ്ര ഫഡ് നാവിസ് പറഞ്ഞു.
ആകെയുള്ള കോര്പറേറ്റര്മാരുടെ എണ്ണത്തിലും ബിജെപി വന്മുന്നേറ്റം നടത്തി. 2017ല് വെറും 1602 സീറ്റുകളാണ് ബിജെപി നേടിയതെങ്കില്, ഇപ്പോള് 3325 സീറ്റുകള് ബിജെപി നേടി. ബിജെപിയുടെ വിജയം ഇരട്ടിയായി വര്ധിച്ചു.ആകെയുള്ള 6952 കോര്പറേറ്റര്മാരില് മഹായുതി സഖ്യം 4331 സീറ്റുകള് സ്വന്തമാക്കി. – ഫഡ് നാവിസ് പറഞ്ഞു.
ബിജെപി പ്രവര്ത്തകരുടെ പ്രതിബദ്ധത, കഠിനധ്വാനം, നിരന്തരപരിശ്രമം എന്നിവയാണ് വിജയത്തില് കലാശിച്ചത്. ഇനി ജനവരി 15ന് നടക്കുന്ന മുംബൈ മുനിസിപ്പല് കോര്പറേഷന് (ബൃഹണ്മയി മുംബൈ കോര്പറേഷന്-ബിഎംസി) തെരഞ്ഞെടുപ്പിലും മഹായുതി സഖ്യം തൂത്തുവാരുമെന്ന് ഫഡ് നാവിസ് പറഞ്ഞു.
ബിജെപിയും ഉദ്ധവ് താക്കറെയുടെ ശിവസേനയും ചേര്ന്ന് കഴിഞ്ഞ 25 വര്ഷമായി മുംബൈ മുനിസിപ്പല് കോര്പറേഷന് (ബൃഹണ്മയി മുംബൈ കോര്പറേഷന്-ബിഎംസി) ഭരിക്കുകയായിരുന്നു. എന്നാല് 2017ല് ബിജെപിയും ഉദ്ധവ് താക്കറെ ശിവസേനയും തമ്മിലുള്ള സഖ്യം തകര്ന്നു. ഇപ്പോള് എട്ട് വര്ഷത്തെ ഇടവേളയ്ക്ക് ശേഷം വീണ്ടും ഈ ജനുവരി 15ന് ബിഎംസി തെരഞ്ഞെടുപ്പ് നടക്കുകയാണ്.
