സന്നിധാനം: ശബരിമല സന്നിധാനത്തെത്തുന്ന സ്ത്രീകൾക്കും കുട്ടികൾക്കും പതിനെട്ടാംപടി കയറുന്നതിൽ പ്രത്യേക നിർദ്ദേശങ്ങളുമായി പോലീസ്. പടി കയറുന്ന സമയത്ത് പരമാവധി വശങ്ങളിലൂടെ നീങ്ങാനാണ് തീർത്ഥാടകർക്ക് നൽകിയിരിക്കുന്ന നിർദ്ദേശം. പടികളുടെ ഇരുവശത്തും നിലയുറപ്പിച്ചിട്ടുള്ള പോലീസ് ഉദ്യോഗസ്ഥർക്ക് ഭക്തരെ പിടിച്ചു കയറ്റുന്നത് കൂടുതൽ എളുപ്പമാക്കാനാണ് ഈ ക്രമീകരണം. സന്നിധാനം സ്പെഷ്യൽ ഓഫീസർ പി. ബാലകൃഷ്ണൻ നായർ അറിയിച്ച ഈ വിവരം മെഗാഫോണുകളിലൂടെ ഭക്തരെ അറിയിച്ചു തുടങ്ങി. മലയാളം ഉൾപ്പെടെ അഞ്ച് ദക്ഷിണേന്ത്യൻ ഭാഷകളിൽ പടിക്കൽ ഡ്യൂട്ടിയുള്ള പോലീസും റാപ്പിഡ് ആക്ഷൻ ഫോഴ്സും നിർദ്ദേശങ്ങൾ നൽകുന്നുണ്ട്.
ദർശനത്തിനിടെയുള്ള മൊബൈൽ ഫോൺ ഉപയോഗത്തിന് ഹൈക്കോടതി നിർദ്ദേശപ്രകാരം കർശന നിയന്ത്രണങ്ങളും ഏർപ്പെടുത്തിയിട്ടുണ്ട്. പതിനെട്ടാം പടി, സോപാനം, ക്ഷേത്ര മതിൽക്കെട്ടിനകം, മാളികപ്പുറം പരിസരം എന്നിവിടങ്ങളിൽ ക്യാമറ ഉപയോഗിക്കുന്നതോ ഫോട്ടോയും വീഡിയോയും പകർത്തുന്നതോ പൂർണ്ണമായും നിരോധിച്ചു. നിയമലംഘനം നടത്തുന്നവർക്കെതിരെ കർശന നിയമനടപടികൾ സ്വീകരിക്കുമെന്നും പോലീസ് മുന്നറിയിപ്പ് നൽകി.
