ന്യൂദല്ഹി: ലോക്സഭയില് സുപ്രധാന ബില്ലുകളില് ചര്ച്ചകള് നടക്കവെ പ്രതിപക്ഷനേതാവ് രാഹുല് ഗാന്ധി വിദേശയാത്രയില്. സമ്മേളനത്തിന്റെ അവസാന ദിവസങ്ങളില് രാഹുല് ജര്മ്മനി സന്ദര്ശിക്കുകയായിരുന്നു. ഇന്ഡി മുന്നണി അംഗങ്ങളായ എംപിമാര് ഉള്പ്പെടെ രാഹുലിന്റെ യാത്രയ്ക്കെതിരെ പരസ്യ പ്രതിഷേധം രേഖപ്പെടുത്തി. ഹാജരാകണമെന്ന് കാണിച്ച് കോണ്ഗ്രസ് അംഗങ്ങളായ എംപിമാര്ക്ക് വിപ്പ് നല്കിയപ്പോള് രാഹുല് സഭയില് എത്താതിരുന്നത് പാര്ട്ടിക്കകത്തും വിമര്ശനത്തിന് കാരണമായി.
മ്യൂണിച്ചിലുള്ള ബിഎംഡബ്ല്യുവിന്റെ പ്ലാന്റ് സന്ദര്ശിക്കുന്നതിന്റെയും ബൈക്ക് ഓടിക്കുന്നതിന്റേയും ദൃശ്യങ്ങള് രാഹുല് സാമൂഹ്യമാധ്യമങ്ങളില് കഴിഞ്ഞദിവസം പങ്കുവെച്ചിരുന്നു. കോണ്ഗ്രസിലും ഇന്ഡി മുന്നണിയിലും രാഹുലിന്റെ നടപടിക്കെതിരെ വിമര്ശനം രൂക്ഷമാണ്.
വിബി ജി റാം ജി ബില്ലിനെതിരെ പ്രതിപക്ഷം വോട്ടെടുപ്പ് ആവശ്യപ്പെടാതിരുന്നത് വോട്ട് ചെയ്യാന് പ്രതിപക്ഷ നേതാവ് ഇല്ലാതിരുന്നതുകൊണ്ടാണെന്നായിരുന്നു സിപിഎം എംപി ജോണ് ബ്രിട്ടാസിന്റെ പ്രതികരണം. ലോക്സഭയില് ബില്ലില് ചര്ച്ച നടക്കുമ്പോള് രാഹുല് ബിഎംഡബ്ല്യു ബൈക്ക് ഓടിക്കുകയാണ്. ഒരാഴ്ച കഴിഞ്ഞ് ബൈക്ക് ഓടിച്ചാല് പോരെ, ബിഎംഡബ്ല്യു കമ്പനി അവിടെത്തന്നെ ഉണ്ടാകുമല്ലോ, പൂട്ടിപ്പോകില്ലല്ലോ എന്നും ബ്രിട്ടാസ് ചോദിച്ചു.
