നടനും സംവിധായകനും തിരക്കഥാകൃത്തുമായ ശ്രീനിവാസൻ 48 വർഷം നീണ്ട സിനിമാ ജീവിതത്തിന് വിട പറഞ്ഞിരിക്കുകയാണ്. ഒരുപാട് നാളായി അസുഖബാധിതനായി ഉദയംപേരൂരിലെ വീട്ടിൽ ചികിത്സയിലായിരുന്നു. പെട്ടെന്ന് അസുഖം മൂർച്ഛിച്ചതിനെത്തുടർന്ന് തൃപ്പൂണിത്തുറയിലെ ആശുപത്രിയിൽ പ്രവേശിപ്പിച്ചു. ശനിയാഴ്ച രാവിലെയോടെയാണ് മരണം സ്ഥിരീകരിച്ചത്.
2022ലാണ് ഹൃദയാഘാതത്തെ തുടർന്ന് ശ്രീനിസാവൻ ആശുപത്രിയിലായത്. ഇപ്പോഴിതാ ആശുപത്രി വാസത്തെ കുറിച്ച് ശ്രീനിവാസൻ പറഞ്ഞ വാക്കുകൾ ശ്രദ്ധനേടുകയാണ്. മരണത്തെ കുറിച്ച് തനിക്ക് ഇപ്പോള് പേടിയില്ല. മരണമാണ് നല്ലതെന്ന് നോന്നിയിട്ടുണ്ട്. താന് അഞ്ചാറ് തവണ മരിച്ചു കഴിഞ്ഞു എന്നാണ് ശ്രീനിവാസന് അന്ന് പറഞ്ഞത്.
മരണം എനിക്കിപ്പോള് ഒരു വിഷയം അല്ല, കാരണം ഞാന് അഞ്ചാറ് പ്രാവശ്യം മരിച്ചു. ശ്വാസംമുട്ടല് വന്ന് ബോധം പോയപ്പോള് അതൊക്കെ മരണം ആയിരുന്നു. വേദന കൊണ്ട് ഞാന് പുളഞ്ഞിട്ടുണ്ട്. ഹോസ്പിറ്റല് വരെ എത്തില്ലെന്ന് ഞാന് പേടിച്ചിട്ടുണ്ട്. വേദന സഹിക്കാന് പറ്റില്ല. അതിനേക്കാള് നല്ലത് മരണമാണെന്ന് തോന്നും. അപ്പോള് പിന്നെ മരണത്തെ പേടിയില്ല. ബോധം പോയി ആദ്യം എത്തുന്നത് എറണാകുളം മെഡിക്കല് സെന്ററിലാണ്. 24 മണിക്കൂര് കഴിഞ്ഞാണ് ബോധം വരുന്നത്. സിപിആര് കഴിഞ്ഞു എന്ന് അതിന് ശേഷമാണ് ആള്ക്കാര് പറയുന്നത്. അതിനിടയില് മരിച്ചാല് താന് പോലും അറിയില്ല” ശ്രീനിവാസൻ പറഞ്ഞിരുന്നു.
മലയാള സിനിമയിലെ സകലകലാവല്ലവഭൻ
അഭിനയ ഡിപ്ലോമ പൂർത്തിയാക്കിയ ശേഷം 1976-ൽ പി. എ. ബക്കർ സംവിധാനം ചെയ്ത മണിമുഴക്കം എന്ന ചിത്രത്തിലൂടെയാണ് ശ്രീനിവാസൻ സിനിമാരംഗത്തേക്ക് കടന്നുവരുന്നത്. മികച്ചൊരു ഡബ്ബിംഗ് ആർട്ടിസ്റ്റ് കൂടിയായ അദ്ദേഹം വിധിച്ചതും കൊതിച്ചതും, വിൽക്കാനുണ്ട് സ്വപ്നങ്ങൾ, ഒരു മാടപ്പിറാവിന്റെ കഥ, കെ. ജി. ജോർജിന്റെ മേള എന്നീ ചിത്രങ്ങളിൽ മമ്മുട്ടിക്കായി ശബ്ദം നൽകി. ഒരു മുത്തശ്ശിക്കഥ എന്ന ചിത്രത്തിൽ തമിഴ് നടൻ ത്യാഗരാജനുവേണ്ടിയും, പല്ലാങ്കുഴൽ എന്ന ചിത്രത്തിലെ നായകൻ സാംബശിവനുവേണ്ടിയും ശബ്ദം നൽകിയതും ശ്രീനിവാസനായിരുന്നു. കുറച്ച് ചെറിയ വേഷങ്ങളിൽ അഭിനയിച്ചതിന് ശേഷം, 1984-ൽ ഓടരുതമ്മാവാ ആളറിയാം എന്ന ചിത്രത്തിന് കഥ എഴുതി അദ്ദേഹം ശ്രദ്ധ നേടി. തുടർന്ന് തിരക്കഥാകൃത്തായും നടനായും മലയാള സിനിമയിൽ സജീവ സാന്നിധ്യമായി ശ്രീനിവാസൻ മാറുകയായിരുന്നു.
