തിരുവനന്തപുരം: ആവിഷ്കാര സ്വാതന്ത്ര്യത്തിനു മേലുള്ള കടന്നുകയറ്റത്തില് മുട്ടുമടക്കില്ല! പറയുന്നത് രാഷ്ട്രീയമായി തങ്ങളെ വിമര്ശിക്കുന്ന ഒരു പാരഡിപ്പാട്ടിനെപ്പോലും നിരോധിച്ച മുഖ്യമന്ത്രി പിണറായി വിജയന്. ഐഎഫ്എഫ്കെ സമാപന വേദിയില് സംസാരിക്കുകയായിരുന്നു മുഖ്യമന്ത്രി.
കേരള രാജ്യാന്തര ചലച്ചിത്ര മേളയെ ഞെരിച്ച് കൊല്ലാനുള്ള ശ്രമമാണ് ഉണ്ടായതെന്ന് മുഖ്യമന്ത്രി കുറ്റപ്പെടുത്തി. അത് തിരിച്ചറിഞ്ഞാണ് സംസ്ഥാന സര്ക്കാര് ഇടപെട്ടത്. അതിജീവനത്തിനായി പൊരുതുന്ന മൂന്നാം ലോക രാജ്യങ്ങളിലെ ചിത്രങ്ങള്ക്കാണ് ഐഎഫ്എഫ്കെ പ്രാമുഖ്യം നല്കിയിട്ടുള്ളത്.
ഏതൊക്കെ കലാകാരന്മാര് വരണം എന്നതില് പോലും കേന്ദ്രം കൈകടത്തുന്നുവെന്നും ഇത് അത്യന്തം പ്രതിഷേധാര്ഹമാണെന്നും പിണറായി പറഞ്ഞു. ഞങ്ങള്ക്ക് ഇഷ്ടമല്ലാത്തത് നിങ്ങള് കാണേണ്ട എന്നാണ് നിലപാട്.
കേരളത്തിലെ ചലച്ചിത്രമേള മറ്റ് മേളകളില് നിന്ന് വ്യത്യസ്തമാണെന്നും സ്വാതന്ത്ര്യവും ജനാധിപത്യ മൂല്യങ്ങളും ഉയര്ത്തിപിടിച്ചതാണ് ഈ മേളയെന്നും പിണറായി വിജയന് അവകാശപ്പെട്ടു.
