പാലക്കാട്: വാളയാറിലെ ആള്ക്കൂട്ടക്കൊലയില് കേസെടുത്ത് മനുഷ്യാവകാശ കമ്മീഷന്. പാലക്കാട് ജില്ലാ പൊലീസ് മേധാവി അന്വേഷിച്ച് മൂന്നാഴ്ചയ്ക്കകം റിപ്പോര്ട്ട് സമര്പ്പിക്കണം.
വാളയാര് അട്ടപ്പള്ളത്താണ് ആള്ക്കൂട്ട മര്ദനത്തില് അതിഥിതൊഴിലാളി കൊല്ലപ്പെട്ടത്.മണിക്കൂറുകള് നീണ്ട വിചാരണയും കൊടും ക്രൂരതയുമാണ് ഇയാള് നേരിട്ടത് എന്നാണ് വിവരം. കൊടിയ മര്ദ്ദനമേറ്റെന്ന് പോസ്റ്റമോര്ട്ടം റിപ്പോര്ട്ടില് പറയുന്നു.മോഷ്ടാവാണെന്ന് സംശയിച്ചാണ് ആള്ക്കൂട്ടം ഛത്തീസ്ഗഡ് സ്വദേശി രാംനാരായണന് ഭയ്യയെ മര്ദിച്ചത്.സംഭവത്തില് അഞ്ചു പേരെ പൊലീസ് അറസ്റ്റ് ചെയ്തു. വിശദമായ അന്വേഷണം നടക്കുന്നുണ്ടെന്നും കൂടുതല് അറസ്റ്റ് ഉണ്ടാകുമെന്നും പൊലീസ് അറിയിച്ചു.
കഞ്ചിക്കോട് ജോലി തേടിയാണ് രാംനാരായണന് ഭയ്യ ഒരാഴ്ച മുമ്പ് പാലക്കാട് എത്തിയത്.പരിചയമില്ലാത്ത സ്ഥലത്ത് വഴിതെറ്റി വാളയാറിലെ അട്ടപ്പള്ളത്തെത്തി. മൂന്ന് വര്ഷം മുന്പേ ഭാര്യ ഉപേക്ഷിച്ച് പോയതോടെ ചില മാനസിക പ്രശ്നങ്ങള് രാംനാരായണന് ഉണ്ടായിരുന്നു. അട്ടപ്പള്ളത്തെ തൊഴിലുറപ്പ് സ്ത്രീകള് ആണ് രാം നാരായണനെ ആദ്യം പ്രദേശത്ത് കാണുന്നത്. ഇവര് സമീപത്തെ യുവാക്കളെ വിവരം അറിയിച്ചതോടെ പ്രദേശവാസികള് സംഘം ചേര്ന്ന് രാം നാരായണനെ തടഞ്ഞുവെച്ചു. കള്ളന് എന്ന് ആരോപിച്ചു വിചാരണ ചെയ്ത് മര്ദ്ദിച്ചു.
അവശനിലയില് ആയ രാംനാരായണനെ പൊലീസ് പാലക്കാട് ജില്ലാ ആശുപത്രിയിലേക്ക് മാറ്റിയെങ്കിലും മരിച്ചു. രാംനാരായണന് കള്ളന് ആണെന്ന ആരോപണം കുടുംബം പൂര്ണമായും നിഷേധിച്ചു.
