കൊച്ചി : കിഫ്ബി മസാലബോണ്ട് കേസില് ഇ ഡി നോട്ടീസിന് മേലുള്ള തുടര്നടപടികള് തടഞ്ഞ ഹൈക്കോടതി സിംഗിള് ബെഞ്ച് ഉത്തരവിന് സ്റ്റേ. ഇഡിയുടെ അപ്പീലിലാണ് ഡിവിഷന് ബെഞ്ചിന്റെ നടപടി.
ജസ്റ്റിസ് വി ജി അരുണിന്റെ ബെഞ്ചാണ് എന്ഫോഴ്സ്മന്റ് ഡയറക്ടറേറ്റ് കിഫ്ബിക്ക് അയച്ച നോട്ടീസിന്മേലുള്ള തുടര്നടപടികള് മൂന്ന് മാസത്തേക്ക് സ്റ്റേ ചെയ്തത്.ഇ ഡി ഡിവിഷന് ബെഞ്ചിനെ സമീപിച്ച് ഈ സ്റ്റേ നീക്കുകയായിരുന്നു. വിഷയം സിംഗിള് ബെഞ്ചിന്റെ അധികാര പരിധിയ്ക്ക് പുറത്തുള്ളതാണെന്നും അതിനാല് നടപടികള് സ്റ്റേ ചെയ്തത് ശരിയല്ലെന്നുമാണ് ഇഡി അപ്പീലില് വാദമുയര്ത്തിയത്. നോട്ടീസ് അയയ്ക്കുക എന്നത് പ്രാഥമിക നടപടി മാത്രമാണെന്നും ചൂണ്ടിക്കാട്ടി.
മസാല ബോണ്ട് വഴി സമാഹരിച്ച പണം വികസന പദ്ധതികള്ക്ക് ഉപയോഗിച്ചെന്നായിരുന്നു കിഫ്ബി ചൂണ്ടിക്കാട്ടിയിരുന്നത്.എന്നാല് മസാല ബോണ്ട് വഴി സമാഹരിച്ച പണം കിഫ്ബി ഭൂമി വാങ്ങാന് ഉപയോഗിച്ചെന്നും ഇത് ഫെമ ചട്ടങ്ങളുടെ ലംഘനമാണെന്നുമാണ് ഇ.ഡി നോട്ടീസിസല് ആരോപിച്ചത്.
എന്നാല് ഭൂമി വാങ്ങുകയല്ല വികസന പദ്ധതികള്ക്കായി ഏറ്റെടുക്കുകയാണ് ചെയ്തതെന്നാണ് കിഫ്ബി ഹര്ജിയില് ചൂണ്ടിക്കാട്ടിയത്. മസാല ബോണ്ട് കേസില് മുഖ്യമന്ത്രി പിണറായി വിജയനും മുന് ധനമന്ത്രി ഡോ. തോമസ് ഐസക്കിനും അയച്ച നോട്ടീസിന്മേലുള്ള തുടര് നടപടികളും കഴിഞ്ഞ ദിവസം ഹൈക്കോടതി സിംഗിള് ബെഞ്ച് സ്റ്റേ ചെയ്തിരുന്നു.
2672 കോടി രൂപ സമാഹരിച്ചതില് 467 കോടി രൂപ ഭൂമി വാങ്ങാന് കിഫ്ബി ഉപയോഗിച്ചതില് ചട്ടലംഘനം ഉണ്ടെന്നാണ് ഇ.ഡിയുടെ ആരോപണം. വിദേശ ധനകാര്യ വിപണികളില്നിന്ന് പണം സമാഹരിക്കാന് ഇന്ത്യന് കറന്സി അടിസ്ഥാനമാക്കി ഇന്ത്യയിലെ സ്ഥാപനങ്ങള്ക്ക് ഇറക്കാവുന്ന ബോണ്ട് ആണ് മസാല ബോണ്ട്. വിദേശ വാണിജ്യ വായ്പ ഇന്ത്യന് രൂപയില് ലഭിക്കുമെന്നതാണ് പ്രത്യേകത.
