ന്യൂദല്ഹി: പ്രധാനമന്ത്രി മ്യൂസിയം ആന്ഡ് ലൈബ്രറിയില് നിന്നും കൈക്കലാക്കിയ പ്രഥമ പ്രധാനമന്ത്രി ജവഹര്ലാല് നെഹ്റുവിന്റെ സ്വകാര്യ രേഖകളും കത്തുകളും സോണിയാ ഗാന്ധി ഇനിയും മടക്കി നല്കിയില്ലെന്ന് കേന്ദ്ര സര്ക്കാര്.
2008ലാണ് പിഎംഎംഎല് നിന്നും ‘നെഹ്റു പേപ്പേഴ്സ്’ ആണ് സോണിയ കൊണ്ടുപോയത്. സാംസ്കാരിക മന്ത്രാലയം ആവര്ത്തിച്ച് ആവശ്യപ്പെട്ടിട്ടും രേഖകള് തിരികെ നല്കാന് സോണിയ തയാറായിട്ടില്ല. രേഖകളില് നെഹ്റുവും എഡ്വിന മൗണ്ട്ബാറ്റണ്, ജയപ്രകാശ് നാരായണ്, അരുണ ആസഫ് അലി, വിജയലക്ഷ്മി പണ്ഡിറ്റ്, ജഗ്ജീവന് റാം തുടങ്ങിയവരുമായുള്ള കത്തിടപാടുകളും ഉള്പ്പെടുന്നു.
കഴിഞ്ഞ ദിവസം ബിജെപി എംപി സമ്പിത് പത്ര പിഎംഎംഎല് നിന്നും നെഹ്റുവിന്റെ കത്തുകള് കാണാതായോ എന്ന ചോദ്യം ഉന്നയിച്ചിരുന്നു. നെഹ്റുവിന്റെ രേഖകള് പിഎംഎംഎല്ലില് നിന്ന് കാണാതായിട്ടില്ലെന്ന് കേന്ദ്ര സാംസ്കാരിക മന്ത്രി ഗജേന്ദ്ര സിങ് ശെഖാവത്ത് മറുപടിയും നല്കി. പിന്നാലെ കേന്ദ്രസര്ക്കാര് തെറ്റായ മറുപടിയാണ് നല്കിയതെന്ന് പറഞ്ഞ് കോണ്ഗ്രസ് ബഹളം വെച്ചു. ഇതോടെയാണ് കോണ്ഗ്രസിനെ സമ്പൂര്ണമായും വെട്ടിലാക്കുന്ന വിശദീകരണവുമായി മന്ത്രാലയം എത്തിയത്.
‘2008 ഏപ്രില് 29നാണ് നെഹ്റുവിന്റെ കത്തുകളും കുറിപ്പുകളും നല്കണമെന്ന് ആവശ്യപ്പെട്ട് പിഎംഎംഎല്ലിന് സോണിയ കത്തയച്ചത്. അതനുസരിച്ച്, 2008ല് 51 പെട്ടികളിലാക്കി നെഹ്റു പേപ്പറുകള് സോണിയ കൊണ്ടുപോയി. 2025 ജനുവരി 28 നും 2025 ജൂലൈ 3നും അടക്കം കേന്ദ്ര സാംസ്കാരിക മന്ത്രാലയം ഈ രേഖകള് ആവശ്യപ്പെട്ട് സോണിയയ്ക്ക് കത്തയച്ചിരുന്നു. രേഖകള് രാജ്യത്തിന്റെ ഡോക്യുമെന്ററി പൈതൃകത്തിന്റെ ഭാഗമാണ്, സ്വകാര്യ സ്വത്തിന്റെ ഭാഗമല്ല. ഇവയുടെ സംരക്ഷണം പിഎംഎംഎല്ലിനാണെന്നും മന്ത്രാലയം വ്യക്തമാക്കി.
