തിരുവനന്തപുരം: ഗവര്ണറെ അവഹേളിച്ച് സസ്പെന്ഷനിലായ കേരള സര്വകലാശാല മുന് രജിസ്ട്രാര് ഡോ. കെ.എസ്. അനില് കുമാര് ഗുരുതര ചട്ടലംഘനം നടത്തി ശാസ്താംകോട്ട ദേവസ്വം ബോര്ഡ് കോളജില് പ്രിന്സിപ്പലായി ജോലിയില് പ്രവേശിച്ചു. സസ്പെന്ഷന് പിന്വലിക്കാതെ തിരികെ ജോലിയില് പ്രവേശിക്കാന് കഴിയില്ലെന്നിരിക്കേ നിയമ വിരുദ്ധമായി സ്വയം വിടുതല് (റിലീവിങ്) സര്ട്ടിഫിക്കറ്റ് തയാറാക്കിയാണ് ഇന്നലെ കോളജിലെത്തി പ്രിന്സിപ്പലായി ചേര്ന്നത്.
ഗുരുതരമായ കൃത്യവിലോപത്തിന് അച്ചടക്ക നടപടി നേരിടുന്ന അനില് കുമാറിനെ സര്വകലാശാലയില് നിന്നുള്ള ഔദ്യോഗിക വിടുതല് സര്ട്ടിഫിക്കറ്റില്ലാതെ കോളജ് സര്വീസില് പ്രവേശിപ്പിക്കരുതെന്ന് തിരുവിതാംകൂര് ദേവസ്വം ബോ
ര്ഡ് സെക്രട്ടറിയെ അറിയിക്കാന് വിസി ഡോ. മോഹനന് കുന്നുമ്മല് ഉത്തരവിട്ടു. ഉത്തരവിന്റെ അടിസ്ഥാനത്തില് സര്വകലാശാല രജിസ്ട്രാര് ഇന് ചാര്ജ് ആര്. രശ്മി ദേവസ്വം ബോര്ഡ് കോളജ് പ്രിന്സിപ്പലിനു കത്തു നല്കി. അനില്കുമാര് ഇപ്പോഴും കേരള സര്വകലാശാല ഉദ്യോഗസ്ഥനാണെന്നും സര്വകലാശാല കൃത്യമായ രീതിയില് വിടുതല് നല്കിയിട്ടില്ലെന്നും കത്തില് പറയുന്നു. കോളജില് പ്രിന്സിപ്പലായി ജോലിയില് പ്രവേശിക്കാന് അനുവദിക്കരുതെന്നും രജിസ്ട്രാന് നിര്ദേശിച്ചു.
അനില്കുമാറിന്റെ അപേക്ഷ പ്രകാരം മാതൃസ്ഥാപനമായ ദേവസ്വം ബോര്ഡ് കോളജിലേക്കുമടങ്ങിപ്പോകുന്നതിന് അദ്ദേഹത്തിന്റെ ഡെപ്യൂട്ടേഷന് സര്ക്കാര് പിന്വലിച്ചിരുന്നു. തുടര്ന്ന് വിടുതല് ചെയ്യണമെന്നാവശ്യപ്പെട്ട് സര്വകലാശാലയ്ക്ക്അപേക്ഷ സമര്പ്പിക്കുന്നതിനു പകരം സ്വന്തമായി വിടുതല് സര്ട്ടിഫിക്കറ്റ് തയാറാക്കി. സ്വയം സാക്ഷ്യപ്പെടുത്തിയ ഈ സര്ട്ടിഫിക്കറ്റിന്റെ അടിസ്ഥാനത്തിലാണ് ദേവസ്വം ബോര്ഡ് കോളജില് പ്രിന്സിപ്പല് പദവി ഏറ്റെടുത്തത്.
ഭാരതാംബ വിഷയത്തെ തുടര്ന്ന് സസ്പെന്ഷനിലായ അനില്കുമാറിന്റെ സസ്പെന്ഷന് പിന്വലിക്കാന് സിന്ഡിക്കറ്റ് തീരുമാനിച്ചിരുന്നു. എന്നാല് സസ്പെന്ഷന് കാലയളവില് അനധികൃതമായി ഓഫീസ് സീല് ഉപയോഗിച്ച് പാസ്പോര്ട്ട് അപേക്ഷകള് നല്കുകയും 550 ഫയലുകളില് തീര്പ്പു കല്പ്പിക്കുകയുംചെയ്തിരുന്നു. ഇത് അന്വേഷിക്കാന് പോലീസ് കേസ് രജിസ്റ്റര് ചെയ്തിരിക്കുന്നതിനാല് സസ്പെന്ഷന് പിന്വലിക്കാനുള്ള സിന്ഡിക്കറ്റ് തീരുമാനംനടപ്പാക്കുന്നതിന് ഗവര്ണറുടെ അനുമതി വിസി തേടിയിരിക്കുമ്പോഴാണ് ചട്ടവിരുദ്ധമായി പ്രിന്സിപ്പലായി ചുമതലയേറ്റത്.
