പത്തനംതിട്ട: ശബരിമല സ്വര്ണക്കൊള്ളക്കേസില് മുന് ദേവസ്വം ബോര്ഡ് സെക്രട്ടറി എസ്. ജയശ്രീക്ക് കുരുക്കായത് സ്വര്ണപ്പാളികള് സംബന്ധിച്ച ഉത്തരവില് അധികമായി മറ്റൊരു കൈയക്ഷരത്തില് എഴുതിച്ചേര്ത്ത വാചകം.
ദേവസ്വം ബോര്ഡ് തീരുമാന പ്രകാരം 2019 ജൂലൈ അഞ്ചിന് ദേവസ്വം ബോര്ഡ് സെക്രട്ടറിയായിരുന്ന എസ്. ജയശ്രീ തയാറാക്കിയ ആര്ഒസി 9097/ 195/ എം നമ്പര് ഉത്തരവില് കടന്നു കൂടിയ അധിക വാചകമാണ് അവര് പ്രതിസ്ഥാനത്ത് എത്താനുള്ള പ്രധാന കാരണം.
പ്രധാന കുറിപ്പില് ദ്വാരപാലക കവചങ്ങളെ ‘ചെമ്പുപാളികള്’ എന്നാണ് വിശേഷണമെങ്കിലും ‘ ‘ചെമ്പുപാളികളും ചെമ്പു തകിടുകളും ഇളക്കി ഉണ്ണികൃഷ്ണന് പോറ്റിക്ക് സ്വര്ണം പൂശുന്നതിനായി കൈമാറുന്നതിന്’ എന്ന അധിക വാചകം മറ്റൊരു കൈയക്ഷരത്തില് എങ്ങനെ വന്നു എന്നതാണ് പ്രധാന ചോദ്യം. ഈ വാചകം ബോര്ഡ് തീരുമാന പ്രകാരം അല്ലെന്നതാണ് വിജിലന്സ് ചൂണ്ടിക്കാട്ടുന്ന വലിയ വീഴ്ച്ച. ഇതിന് ദേവസ്വം സെക്രട്ടറി മറുപടി പറയണമെന്നും ജയശ്രീക്കെതിരെ അച്ചടക്ക നടപടി സ്വീകരിക്കണമെന്നുമായിരുന്നു വിജിലന്സ് നിര്ദ്ദേശം.
ഈ വാചകം ദേവസ്വം ബോര്ഡ് പ്രസിഡന്റ് എ. പത്മകുമാര് അധികമായി എഴുതി ചേര്ത്തതാണെന്നാണ് എസ്ഐടി ഇപ്പോള് തെളിവു സഹിതം കണ്ടെത്തിയിട്ടുള്ളത്. ദേവസ്വം ബോര്ഡ് ചെമ്പു പാളികള് കടത്താന് കൂട്ടായ തീരുമാനം എടുത്ത ശേഷം ഉത്തരവില് വന്ന അധിക എഴുത്തിന് ദേവസ്വം സെക്രട്ടറിക്കും പങ്കുണ്ടെന്ന കാര്യം വ്യക്തമാണ്.
