തിരുവനന്തപുരം: തലച്ചോറിലുണ്ടായ രക്തസ്രാവത്തെത്തുടര്ന്ന് മസ്തിഷ്ക മരണം സംഭവിച്ച കവടിയാര് ജവഹര് നഗര് സ്വദേശി ദിവാകര് എസ്. രാജേഷ് (53) ഇനി അഞ്ച് പേരിലൂടെ ജീവിക്കും.അവയവങ്ങള് അഞ്ച് പേര്ക്ക് ദാനം ചെയ്തു. ദിവാകറിന്റെ വൃക്കകള്, കരള്, രണ്ട് നേത്രപടലങ്ങള് എന്നിവയാണ് ദാനം ചെയ്തത്.
ഒരു വൃക്കയും കരളും തിരുവനന്തപുരത്തെ സ്വകാര്യ ആശുപത്രിയിലെ രോഗിക്കാണ് നല്കുന്നത്. ഒരു വൃക്ക കോഴിക്കോടുള്ള സ്വകാര്യ ആശുപത്രിയിലെ രോഗിക്കും രണ്ട് നേത്രപടലങ്ങള് റീജിയണല് ഇന്സ്റ്റിറ്റ്യൂട്ട് ഓഫ് ഓഫ്താല്മോളജിയിലെ രോഗികള്ക്കുമാണ് നല്കിയത്.
തീവ്ര ദുഃഖത്തിലും അവയവദാനം നടത്തിയ ദിവാകറിന്റെ കുടുംബാംഗങ്ങളെ ആരോഗ്യ വകുപ്പ് മന്ത്രി വീണാ ജോര്ജ് നന്ദി അറിയിച്ചു.
തിരുവനന്തപുരത്ത് ടാക്സ് കണ്സള്ട്ടന്റായി പ്രവര്ത്തിക്കുകയായിരുന്ന ദിവാകറിനെ ഡിസംബര് 14ന് രാത്രി 10ന് കടുത്ത തലചുറ്റലിനെ തുടര്ന്ന് തിരുവനന്തപുരത്തെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു. ഡിസംബര് 17ന് മസ്തിഷ്ക മരണം സ്ഥിരീകരിച്ചു.തുടര്ന്ന് കുടുംബാംഗങ്ങള് അവയവദാനത്തിന് സമ്മതം നല്കിയത് പ്രകാരം കെ-സോട്ടോയുടെ നേതൃത്വത്തിലാണ് അവയവദാന നടപടിക്രമങ്ങളും ഏകോപനവും പൂര്ത്തിയായത്. അഡ്വക്കേറ്റ് അശ്വതി ബോസാണ് ഭാര്യ: പ്ലസ്ടു വിദ്യാര്ഥി പൂര്ണിമ രാജേഷാണ് മകള്. സംസ്കാര ചടങ്ങുകള് വെളളിയാഴ്ച ജവഹര്നഗറിലെ വീട്ടില് നടക്കും.
