തൃശൂര് : അതിജീവിത നല്കിയ സൈബര് ആക്രമണ പരാതിയില് നടിയെ ആക്രമിച്ച കേസിലെ രണ്ടാം പ്രതി മാര്ട്ടിന് ആന്റണിക്കെതിരെ കേസെടുത്ത് തൃശൂര് സിറ്റി പൊലീസ്.അതിജീവിതയുടെ പേര് വെളിപ്പെടുത്തി, സമൂഹ മാധ്യമങ്ങളിലൂടെ അധിക്ഷേപിച്ചു എന്നിങ്ങനെയാണ് എഫ്ഐആറില് ഉളളത്.വിഡിയോ ഷെയര് ചെയ്തവരും കേസില് പ്രതികളാകും.
കേസിലെ ശിക്ഷാവിധി പുറത്തുവന്ന ശേഷമാണ് രണ്ടാം പ്രതി മാര്ട്ടിന് ആന്റണിയുടെ വെളിപ്പെടുത്തല് എന്ന പേരില് വിഡിയോ സാമൂഹ്യ മാധ്യമങ്ങളില് പ്രചരിച്ചത്.തന്നെയും കേസില് കോടതി കുറ്റവിമുക്തനാക്കിയ നടന് ദിലീപിനെയും ഉള്പ്പെടെ മനപൂര്വം ചിലര് കുടുക്കിയെന്ന് ആരോപിച്ചായിരുന്നു വിഡിയോ.അതിജീവിതയുടെ പേര് ഇയാള് വിഡിയോയില് പലവട്ടം ആവര്ത്തിച്ച് പറയുന്നുണ്ട്.
മാര്ട്ടിനെ നിലവില് കോടതി 20 വര്ഷം തടവിന് ശിക്ഷിച്ചിരിക്കുകയാണ്. പ്രതിയുടെ പേര് പരാമര്ശിച്ച് തന്നെയാണ് അതിജീവിത കഴിഞ്ഞ ദിവസം മുഖ്യമന്ത്രിക്ക് പരാതി നല്കിയത് എന്നാണ് അറിയുന്നത്.
