കാലടി: ആഗോള സേവാപ്രസ്ഥാനമായ ശ്രീരാമകൃഷ്ണ മിഷനും ശ്രീരാമകൃഷ്ണ മഠവും ഭാരതത്തിലെ 244 ബ്രാഞ്ച് സെന്ററുകളും ഉപകേന്ദ്രങ്ങളും വഴി മാനവസേവാ പ്രവര്ത്തനങ്ങള്ക്കായി 1670 കോടി രൂപ 2024-2025 സാമ്പത്തിക വര്ഷത്തില് ചെലവഴിച്ചതായി ശ്രീരാമകൃഷ്ണ മിഷന് ജനറല് സെക്രട്ടറി സ്വാമി സുവീരാനന്ദ അറിയിച്ചു. ശ്രീരാമകൃഷ്ണ കേന്ദ്ര ആസ്ഥാനമായ ബേലൂര് മഠത്തില് നടന്ന 116-ാമത് മിഷന് വാര്ഷിക യോഗത്തിലാണ് രാമകൃഷ്ണ മിഷന് റിപ്പോര്ട്ട് അവതരിപ്പിച്ചത്.
വിദ്യാഭ്യാസ മേഖലയില് 743.17 കോടിയും ആരോഗ്യരംഗത്ത് 600 കോടിയും മിഷന് സേവാപ്രവര്ത്തനങ്ങള്ക്കായി വിനിയോഗിച്ചു.
കൂടാതെ പൊതുക്ഷേമം, ദുരിതാശ്വാസവും പുനരധിവാസവും, ഗ്രാമീണ ക്ഷേമവും ഗോത്ര ക്ഷേമവും തുടങ്ങി വിവിധ മേഖലകളിലായി 2,12,00,000 ഗുണഭോക്താക്കളിലേക്കാണ് മിഷന് സഹായധനം എത്തിച്ചത്.
ശ്രീരാമകൃഷ്ണ മിഷന് ഹാഫ്ലോങ്, കൂരള് ദംഗ (ആസാം), നെല്ലൂര് (ആന്ധ്രാപ്രദേശ്), സാരതി, സിലിഗുരി എന്നിവിടങ്ങളില് പുതിയ ബ്രാഞ്ച് സെന്ററുകളും ശ്രീരാമകൃഷ്ണ മഠം ആദിപൂര് (ഗുജറാത്ത്), കോലാപൂര് (മഹാരാഷ്ട്ര), പത്തനംതിട്ട (കേരളം) എന്നിവിടങ്ങളില് പുതിയ ബ്രാഞ്ച് സെന്ററുകളും ആരംഭിച്ചു. ഭാരതത്തിന് പുറമെ വാഷിങ്ടണ് ഡിസി (യുഎസ്എ) യില് പുതിയ കേന്ദ്രം ആരംഭിച്ചു.
ഭാരതത്തിന് പുറമെയുള്ള 99 കേന്ദ്രങ്ങളിലും വിവിധ സേവാ പ്രവര്ത്തനങ്ങള് നടത്തിയതായി ജന. സെക്രട്ടറി അറിയിച്ചു. ഇതിനു പുറമേ വിവിധ മേഖലകളിലെ തിളക്കമാര്ന്ന പ്രവര്ത്തനത്തിന് ഭാരത സര്ക്കാരിന്റെ അവാര്ഡുകളും അംഗീകാരങ്ങളും നേടാന് സാധിച്ചതായും അദ്ദേഹം പറഞ്ഞു.
