കൊച്ചി: മാതാ അമൃതാനന്ദമയീ ദേവിയുടെ അച്ഛനും കഥകളി കലാകാരനുമായ ഇടമണ്ണേല് വി. സുഗുണാനന്ദന്റെ സ്മരണാര്ത്ഥമുള്ള കഥകളി പുരസ്കാരം കഥകളി നടനും
അദ്ധ്യാപകനുമായ സദനം വിജയന് വാര്യര്ക്ക്. 50,000 രൂപ, ഫലകം, പ്രശസ്തിപത്രം, പൊന്നാട എന്നിവയടങ്ങുന്ന പുരസ്കാരം 20ന് വൈകിട്ട് 7ന് എറണാകുളം ബ്രഹ്മസ്ഥാനം ഹാളില് നടക്കുന്ന സമ്മേളനത്തില് കൈമാറും.
മാതാ അമൃതാനന്ദമയീ മഠം ജനറല് സെക്രട്ടറി സ്വാമി പൂര്ണാമൃതാനന്ദപുരിയും അമൃതകീര്ത്തി ജേതാവും പ്രമുഖ സാഹിത്യകാരനുമായ സി. രാധാകൃഷ്ണനും ചേര്ന്നാണ് പുരസ്കാരം കൈമാറുന്നത്.
അമൃതാ മെഡിക്കല് കോളജ് പ്രിന്സിപ്പല് ഡോ. ഗിരീഷ്കുമാര്, വൈസ് പ്രിന്സിപ്പല് ഡോ. ആനന്ദകുമാര് എന്നിവരും ചടങ്ങില് സംബന്ധിക്കും.
സമ്മേളനത്തിനു ശേഷം സുഗുണാമൃതം കഥകളി സംഘം പുതിയ വിദ്യാര്ത്ഥികളുടെ അരങ്ങേറ്റവും ഉത്തരാസ്വയംവരം കഥകളിയും നടക്കും. 21ന് വൈകിട്ട് 7 മുതല് ലവണാസുരവധം കഥകളിയും നടക്കും. സദനം കഥകളി അക്കാദമിയില് ഏറെക്കാലം അദ്ധ്യാപകനായി സേവനമനുഷ്ഠിച്ച വിജയന് വാര്യര്ക്ക് കഥകളി ഉപരിപഠനത്തിനുള്ള കേന്ദ്ര സര്ക്കാര് സ്കോളര്ഷിപ്പ് ലഭിച്ചിട്ടുണ്ട്.
പട്ടിക്കാംതൊടി രാവുണ്ണി മേനോന് സ്മാരക ട്രസ്റ്റ് സമ്മാനം, പള്ളിപ്പുറം ഗോപാലന് നായര് സ്മാരക അവാര്ഡ്, ഉണ്ണായി വാര്യര് സ്മാരക കലാനിലയം സമ്മാനം, തൃപ്പൂണിത്തുറ കഥകളി കേന്ദ്രം ഏര്പ്പെടുത്തിയ കെ.വി. കൊച്ചനിയന് തമ്പുരാന് സ്മാരക അവാര്ഡ് എന്നിവയാണ് ലഭിച്ച പ്രമുഖ പുരസ്കാരങ്ങള്.
1997 മുതല് 2016 വരെ ദുബായ്, ഫ്രാന്സ്, സ്വിറ്റ്സര്ലന്ഡ്, ജര്മ്മനി, അമേരിക്ക, മലേഷ്യ, ചൈന, ബെല്ജിയം, ഈജിപ്ത് തുടങ്ങിയ വിദേശരാജ്യങ്ങളില് കഥകളി അവതരിപ്പിച്ചിട്ടുണ്ട്. പച്ച, കത്തി, കരി, താടി, മിനുക്ക് വേഷങ്ങളെല്ലാം കെട്ടിയിട്ടുണ്ട്. എറണാകുളം പ്രസ് ക്ലബില് നടന്ന പത്രസമ്മേളനത്തില് എം.ആര്.എസ്. മേനോന്, ശശി കളരിയേല്, ഹരിഹരന് എസ്. അയ്യര് എന്നിവര് പങ്കെടുത്തു.
