കൊച്ചി: കൈവിട്ട സംസ്കൃതിയെ ഭാരതം വീണ്ടെടുക്കുകയാണെന്ന് ഗവര്ണര് രാജേന്ദ്ര വിശ്വനാഥ് ആര്ലേക്കര്. എറണാകുളത്തപ്പന് ഗ്രൗണ്ടില് നടക്കുന്ന സുകൃതം കാരുണ്യാമൃതം യജ്ഞത്തില് കന്യാദാനം ചടങ്ങില് മുഖ്യാതിഥിയായി പങ്കെടുത്ത് സംസാരിക്കുകയായിരുന്നു അദ്ദേഹം.
ഭാരതീയ പരമ്പര തന്ന സംസ്കൃതിക്കനുസരിച്ചു ജീവിക്കണം. കന്യാദാനം ഏറ്റവും മികച്ച ദാനമാണ്. അഞ്ച് കന്യാദാനമാണ് ഞാന് നിര്വഹിച്ചത്. അതെന്റെ സുകൃതമാണ്. ഒരു വ്യാഴവട്ടമായി സുകൃതം യജ്ഞസമിതി 101 ദമ്പതികളെ സൃഷ്ടിച്ചു. എത്ര വലുതായ കാര്യമാണ്. ഗൃഹസ്ഥാശ്രമത്തില് പ്രവേശിക്കുമ്പോള് സമാജത്തിന് വേണ്ടി ചില ഉത്തരവാദിത്തങ്ങള് ഏറ്റെടുക്കേണ്ടതുണ്ട്. നമ്മുടെ സംസ്കൃതിയെ മാനിച്ച് സല്സന്താനങ്ങളെ സമാജത്തിനായി ഉല്പാദിപ്പിച്ച് വളര്ത്തി ഏല്പ്പിക്കണം. അതിനുള്ള പ്രാപ്തി നിങ്ങള്ക്കുണ്ടാവാന് എന്റെ പ്രാര്ത്ഥനകളെന്നും ഗവര്ണര് പറഞ്ഞു.
കൊച്ചി കപ്പല്ശാല എംഡി മധു എസ്. നായര്, ആര്എസ്എസ് ദക്ഷിണ കേരള പ്രാന്ത സംഘചാലക് പ്രൊഫ. എം.എസ.് രമേശന്, രമ കെ. നായര്, ശ്രീകുമാര് പിള്ള, ജസ്റ്റിസ് ആര്. ഭാസ്കരന്, ഗോവിന്ദന്കുട്ടി മാസ്റ്റര് തുടങ്ങിയവര് ചടങ്ങില് പങ്കെടുത്തു. അഞ്ച് ദമ്പതികള് സമൂഹവിവാഹം നടത്തി. ഓരോ ദമ്പതിമാര്ക്കും 20,000 രൂപ വീതം ഗവര്ണര് ഉപഹാരം നല്കി.
