തൃശൂര്‍ ജില്ലയിലെ നഗരസഭകളില്‍ എന്‍ഡിഎയ്‌ക്ക് മികച്ച മുന്നേറ്റം

തൃശൂര്‍: തൃശൂര്‍ ജില്ലയില്‍ നഗരസഭകളില്‍ എന്‍ഡിഎയ്‌ക്ക് മികച്ച മുന്നേറ്റം. ഏഴില്‍ ആറ് നഗരസഭകളിലും എന്‍ഡിഎയ്‌ക്ക് മുന്നേറ്റം കാഴ്ചവെക്കാന്‍ കഴിഞ്ഞു. കൊടുങ്ങല്ലൂര്‍ നഗരസഭയില്‍ എന്‍ഡിഎ മുഖ്യ പ്രതിപക്ഷമായി തുടരും. 39 വാര്‍ഡുകളുള്ള കുന്നംകുളം നഗരസഭയില്‍ എന്‍ഡിഎ ഏഴ് സീറ്റുകള്‍ നേടി. എല്‍ഡിഎഫിന് 18 സീറ്റുകള്‍ ലഭിച്ചപ്പോള്‍ യുഡിഎഫിന് ലഭിച്ചത് 9 സീറ്റാണ്. അഞ്ച് സ്വതന്ത്രന്മാരും വിജയിച്ചിട്ടുണ്ട്. ഇരിങ്ങാലക്കുട നഗരസഭയില്‍ ആറിടത്ത് ജയിക്കാന്‍ എന്‍ഡിഎയ്‌ക്ക് കഴിഞ്ഞു. ഗുരുവായൂര്‍ നഗരസഭയില്‍ എന്‍ഡിഎയുടെ രണ്ട് പേരും വടക്കാഞ്ചേരി നഗരസഭയില്‍ രണ്ട് പേരും വിജയിച്ചു. ചാലക്കുടി നഗരസഭയില്‍ ഒരു സീറ്റുണ്ട്. 46 സീറ്റുള്ള കൊടുങ്ങല്ലൂര്‍ നഗരസഭയില്‍ 18 സീറ്റ് നേടി എന്‍ഡിഎ പ്രധാന പ്രതിപക്ഷമായി തുടരും. എല്‍ഡിഎഫിന് 25 സീറ്റ് ലഭിച്ചപ്പോള്‍ യുഡിഎഫിന് ലഭിച്ചത് മൂന്ന് സീറ്റാണ്. കൊടുങ്ങല്ലൂരില്‍ ബിജെപിക്കെതിരെ തീവ്രവാദ സംഘടനകളെ കൂട്ടുപിടിച്ചാണ് എല്‍ഡിഎഫിന് ഭരണം നിലനിര്‍ത്താന്‍ സാധിച്ചത്.

കഴിഞ്ഞ തവണ വിജയിച്ച രണ്ടു നഗരസഭകള്‍ യുഡിഎഫ് നിലനിര്‍ത്തി. ഗുരുവായൂര്‍, ചാവക്കാട്, വടക്കാഞ്ചേരി, കൊടുങ്ങല്ലുര്‍, കുന്നംകുളം നഗരസഭകളാണ് എല്‍ഡിഎഫ് നിലനിര്‍ത്തിയത്. ഇരിങ്ങാലക്കുടയില്‍ 21 സീറ്റും ചാലക്കുടിയില്‍ 23 സീറ്റും നേടി യുഡിഎഫ് ഭരണം നിലനിര്‍ത്തി.

കോര്‍പറേഷനില്‍ നില മെച്ചപ്പെടുത്തി എന്‍ഡിഎ

തൃശൂര്‍ കോര്‍പ്പറേഷനില്‍ നില മെച്ചപ്പെടുത്തി എന്‍ഡിഎ. എട്ടിടത്ത് എന്‍ഡിഎ സ്ഥാനാര്‍ത്ഥികള്‍ വിജയിച്ചു. കോര്‍പറേഷന്‍ ഭരണം യുഡിഎഫ് തിരിച്ചുപിടിച്ചു. 33 സീറ്റുകളില്‍ യുഡിഎഫ് സ്ഥാനാര്‍ത്ഥികള്‍ വിജയിച്ചു.

എല്‍ഡിഎഫ് 11 സീറ്റുകളില്‍ ഒതുങ്ങി. പൂങ്കുന്നം, പാട്ടുരായ്‌ക്കല്‍, കണ്ണന്‍കുളങ്ങര, കൊക്കാല, കോട്ടപ്പുറം, കണിമംഗലം, തിരുവമ്പാടി, തേക്കിന്‍കാട് ഡിവിഷനുകളാണ് ബിജെപി സ്ഥാനാര്‍ത്ഥികള്‍ വിജയിച്ചത്.

കഴിഞ്ഞ തവണ ആറിടത്താണ് എന്‍ഡിഎ കൗണ്‍സിലര്‍മാര്‍ വിജയിച്ചിരുന്നത്. എട്ട് ഡിവിഷനുകളില്‍ എന്‍ഡിഎ രണ്ടാം സ്ഥാനത്തെത്തി.

ഗ്രാമപഞ്ചായത്തുകളിലും മികച്ച പ്രകടനവുമായി എന്‍ഡിഎ

ജില്ലയിലെ ഗ്രാമപഞ്ചായത്തുകളിലും മികച്ച പ്രകടനം കാഴ്ചവെച്ച് എന്‍ഡിഎ. തിരുവില്വാമല, അവിണിശ്ശേരി ഗ്രാമപഞ്ചായത്തുകളില്‍ എന്‍ഡിഎ ഭരണത്തിലെത്തും. തിരുവില്വാമലയില്‍ വ്യക്തമായ ഭൂരിപക്ഷത്തോടെ ഭരണം നേടിയപ്പോള്‍ അവിണിശ്ശേരിയില്‍ എന്‍ഡിഎ ഏഴ് സീറ്റുകള്‍ നേടി. യുഡിഎഫിനും ഏഴ് സീറ്റ് ഉണ്ട്.

ഇവിടെ എല്‍ഡിഎഫ് രണ്ട് സീറ്റില്‍ ഒതുങ്ങി. ജില്ലയിലെ 86 ഗ്രാമപഞ്ചായത്തുകളില്‍ എല്‍ഡിഎഫ് 44 ഇടത്ത് ലീഡ് നിലനിര്‍ത്തി. 34 ഗ്രാമ പഞ്ചായത്തുകള്‍ യുഡിഎഫ് നേടി. ഏഴിടത്ത് സമനിലയിലാണ്.