കൊച്ചി: വഖഫ് ഭീകരതയ്ക്കെതിരേ പോരാട്ടം നടക്കുന്ന എറണാകുളം പള്ളിപ്പുറം ഗ്രാമപഞ്ചായത്തിലെ ഒന്നാം വാര്ഡ് മുനമ്പത്ത് ബിജെപിക്ക് ഉജ്ജ്വല വിജയം. ഇരുമുന്നണികളും തങ്ങളെ വഞ്ചിച്ചെന്ന തിരിച്ചറിവിലാണ് മുനമ്പം ജനത ബിജെപിയെ രക്ഷകനായി കണ്ടത്. ആ വിശ്വാസത്തിലാണ് ബിജെപി സ്ഥാനാര്ത്ഥി കുഞ്ഞുമോന് അഗസ്റ്റിന് ഉജ്ജ്വല വിജയം നേടാനായത്. 582 വോട്ടുകള് നേടിയാണ് കുഞ്ഞുമോന് അഗസ്റ്റിന് വിജയിച്ചത്. സിപിഎമ്മിലെ റോക്കി ബിനോയിയേയും (551) കോണ്ഗ്രസിന്റെ ഡാനിയേലിനേയുമാണ് (304) പരാജയപ്പെടുത്തിയത്.
മുന് തെരഞ്ഞെടുപ്പുകളില് ബിജെപിക്ക് സ്ഥാനാര്ത്ഥിയെ നിര്ത്താന് പോലും പ്രവര്ത്തകരില്ലാതിരുന്ന മുനമ്പത്ത് ഇത്തവണ വിജയിക്കാനായി. ഈ വിജയത്തിനു പത്തരമാറ്റാണു തിളക്കം. മുനമ്പത്തെ വിജയാഹ്ലാദ പ്രകടനത്തില് ജനങ്ങള് ഉയര്ത്തിക്കാണിച്ച ബാനറിലെ എഴുത്ത് ‘ഉപ്പുവെള്ളത്തിലും താമര വിരിയും’ എന്നാണ്.
മുനമ്പത്തെ വിജയം വ്യക്തമായ ദിശാ സൂചകമാണ്. ക്രൈസ്തവ ഭൂരിപക്ഷ മേഖലയില് ബിജെപിക്കു വിജയിക്കാനായത് ഇരുമുന്നണികളെയും ഞെട്ടിച്ചു. വഖഫ് ഭീകരതയ്ക്കെതിരേയുള്ള സമരത്തെ ഇവര് അക്ഷരാര്ത്ഥത്തില് ഒറ്റിക്കൊടുക്കുകയായിരുന്നു. അവര്ക്കൊപ്പം നിന്നത് ബിജെപി മാത്രം. ഒരു സ്വകാര്യ വ്യക്തി നല്കിയ കേസില് മുനമ്പംകാര്ക്ക് താത്കാലികമായി കരം അടയ്ക്കാമെന്ന വിധി വന്നപ്പോള് സമരം അവസാനിപ്പിക്കാന് ഇരുമുന്നണികളും ഗൂഢാലോചന നടത്തി. ഭൂസംരക്ഷണ സമിതി കണ്വീനര് തന്നെ യുഡിഎഫ് സ്ഥാനാര്ത്ഥിയാകാന് തയാറായതും നാട്ടുകാരെ ഞെട്ടിച്ചു.
കോടതി വിധിയുടെ മറവില് മുനമ്പത്തെ ഭൂമിയുടെ റവന്യൂ അവകാശങ്ങള് പൂര്ണമായും കിട്ടും മുമ്പ് ഒരുവിഭാഗം സമരം അവസാനിപ്പിക്കുകയാണെന്നു പ്രഖ്യാപിച്ചത് ഈ ഗൂഢാലോചനയുടെ ഫലമായിരുന്നു. റവന്യൂ അവകാശങ്ങള് തടഞ്ഞ അതേ മന്ത്രിമാരില് നിന്നു നാരങ്ങാനീരു വാങ്ങിക്കുടിച്ച് സമരം അവസാനിപ്പിച്ചത് വഞ്ചനയുടെ മറ്റൊരു മുഖമായിരുന്നു. ഇതെല്ലാം ജനങ്ങളില് ഏറെ വേദനയുളവാക്കി. ഇതിന്റെ പ്രതിഫലനം കൂടിയാണ് ഇപ്പോഴത്തെ ജനവിധി.
40 വര്ഷമായി എല്ഡിഎഫ് ഭരിക്കുന്ന പഞ്ചായത്താണ് പള്ളിപ്പുറം. ഇവര് മുനമ്പത്തിന്റെ വേദന മനസിലാക്കാനോ സഹായിക്കാനോ തയാറായില്ല. സമരത്തിനൊപ്പം നില്ക്കുന്ന അവരിലൊരാളായ കുഞ്ഞുമോന് അഗസ്റ്റിന് സ്ഥാനാര്ത്ഥിയായതോടെ അവര് അക്ഷരാര്ഥത്തില് ബിജെപിയെ ഏറ്റെടുക്കുകയായിരുന്നു.
ജന്മഭൂമി ഓണ്ലൈന്