കണ്ണൂര്: നടിയെ ആക്രമിച്ച കേസില് ദിലീപിനെ വെറുതെ വിട്ട കോടതി വിധി പരിശോധിച്ചു വരികയാണെന്നും അപ്പീല് നല്കുന്നതിനെ കുറിച്ചു സര്ക്കാര് പിന്നീട് ആലോചിക്കുമെന്നും മുഖ്യമന്ത്രി പിണറായി വിജയന്. കണ്ണൂര് പ്രസ് ക്ലബ്ബ് സംഘടിപ്പിച്ച തദ്ദേശം 25 തെരഞ്ഞെടുപ്പ് മുഖാമുഖത്തില് പങ്കെടുത്ത് സംസാരിക്കുകയായിരുന്നു അദ്ദേഹം.
സര്ക്കാര് ഇന്നും എപ്പോഴും അതിജീവിതയ്ക്കൊപ്പമാണ്. നാളെയും അങ്ങനെ തന്നെയായിരിക്കും ഇതില് മാറ്റമില്ല. യുഡിഎഫ് കണ്വീനര് ദിലീപിന് നീതി കിട്ടിയെന്ന വിചിത്രമായ പ്രതികരണം നടത്തിയത് തന്നെ അത്ഭുതപ്പെടുത്തി. എന്ത് ഉദ്ദേശ്യത്തിലാണ് അങ്ങനെ പറഞ്ഞതെന്ന് അറിയില്ല. കേരളം മുഴുവന് അതിജീവിതയ്ക്കൊപ്പമാണ് യുഡിഎഫിന്റെ നിലപാട് ഇതല്ലെന്ന് വ്യക്തമായിരിക്കുകയാണ്. പോലീസുകാരിലെ ക്രിമിനലുകള് തന്നെ കേസില് കുടുക്കുന്നതിനായി ഗൂഢാലോചന നടത്തിയതെന്ന ദിലീപിന്റെ പ്രതികരണത്തിന് പിന്നില് എന്താണെന്ന് അറിയില്ല. നീതിയുക്തമായാണ് പോലീസ് കേസ് അന്വേഷണം നടത്തിയത്.
മാധ്യമവാര്ത്തകളുടെ അടിസ്ഥാനത്തിലല്ല അന്വേഷണ ഉദ്യോഗസ്ഥര് കേസ് അന്വേഷണം നടത്തുന്നത്. അവരുടെ മുമ്പില് കിട്ടുന്ന തെളിവുകളുടെ അടിസ്ഥാനത്തിലാണെന്നും മുഖ്യമന്ത്രി പറഞ്ഞു.
കെ റെയില് പദ്ധതിയില് പ്രതീക്ഷ വച്ചിട്ടു കാര്യമില്ലെന്നാണ് തോന്നുന്നത്. അതിനര്ഥം പദ്ധതി ഉപേക്ഷിക്കുന്നു എന്നല്ല, വേറെ വഴി നോക്കേണ്ടി വരുമെന്നും മുഖ്യമന്ത്രി പറഞ്ഞു. കണ്ണൂര് നോര്ത്ത് മലബാര് ചേംബര് ഓഫ് കൊമേഴ്സ് ഹാളില് നടന്ന ചടങ്ങില് പ്രസ് ക്ലബ്ബ് പ്രസിഡന്റ് സി. സുനില്കുമാര് അധ്യക്ഷനായി. സി. പി. എം കണ്ണൂര് ജില്ലാ സെക്രട്ടറി കെ.കെ. രാഗേഷ് പങ്കെടുത്തു. പ്രസ് ക്ലബ് സെക്രട്ടറി കബീര് കണ്ണാടിപ്പറമ്പ് സ്വാഗതവും ജോ. സെക്രട്ടറി കെ. സന്തോഷ് നന്ദിയും പറഞ്ഞു.
