ന്യൂദല്ഹി: എട്ടാം കേന്ദ്ര ശമ്പള കമ്മീഷന് ഔപചാരികമായി രൂപീകരിച്ചുവെന്നും അതിന്റെ പ്രവര്ത്തനങ്ങള് പുരോഗമിക്കുകയാണെന്നും കേന്ദ്ര സര്ക്കാര് ലോക്സഭയില് സ്ഥിരീകരിച്ചു. ധനകാര്യ സഹമന്ത്രി പങ്കജ് ചൗധരി രേഖാമൂലം നല്കിയ മറുപടിയിലൂടെയാണ് ഈ വിശദീകരണം . രൂപീകരിച്ച തീയതി മുതല് 18 മാസത്തിനുള്ളില് കമ്മീഷന് ശുപാര്ശകള് സമര്പ്പിക്കുമെന്ന് മന്ത്രി വ്യക്തമാക്കി. അപ്രകാരമെങ്കില് 2027 മധ്യത്തോടെ അന്തിമ റിപ്പോര്ട്ട് സമര്പ്പിക്കാന് കഴിയും.
8-ാമത് കേന്ദ്ര ശമ്പള കമ്മീഷന്റെ ടേംസ് ഓഫ് റഫറന്സ് നവംബര് 3-നാണ് ഔദ്യോഗികമായി വിജ്ഞാപനം ചെയ്തതെന്ന് മന്ത്രി പറഞ്ഞു. ജസ്റ്റിസ് (റിട്ട.) രഞ്ജന പ്രകാശ് ദേശായിയുടെ നേതൃത്വത്തിലുള്ള കമ്മീഷന് കേന്ദ്ര സര്ക്കാര് ജീവനക്കാര്ക്കും പെന്ഷന്കാര്ക്കും ശമ്പളം, അലവന്സുകള്, പെന്ഷന് ഘടനകള് എന്നിവയില് പരിഷ്കരണങ്ങള് ശുപാര്ശ ചെയ്യും.
ശമ്പള കമ്മീഷന് നടപ്പിലാക്കുന്ന തീയതി പിന്നീട് തീരുമാനിക്കുമെന്ന് പങ്കജ് ചൗധരി പറഞ്ഞു.’ ഏഴാം ശമ്പള കമ്മീഷന്റെ കാലാവധി 2026 ജനുവരി 1 നാണ് അവസാനിക്കുക.
