കൊച്ചി: ആറു പതിറ്റാണ്ടിലേറെ കേരള ഹൈക്കോടതിയില് ഉള്പ്പെടെ അഭിഭാഷകനായിരുന്ന ഇടപ്പള്ളി ഇളങ്ങല്ലൂര് സ്വരൂപത്തിലെ വലിയ തമ്പുരാന് അഡ്വ. വി. ശങ്കരരാജ (94) അന്തരിച്ചു. തിങ്കളാഴ്ച രാവിലെ എട്ടേകാലോടെ വാര്ദ്ധക്യസഹജമായ അസുഖങ്ങള് മൂലമായിരുന്നു അദ്ദേഹത്തിന്റെ അന്ത്യം.
ഇടപ്പള്ളി കൊട്ടാരത്തിലെ വാസുദേവ രാജ വലിയ രാജയുടേയും സാവിത്രി രാജയുടേയും മകനായി 1931ല് ജനിച്ച ശങ്കരരാജയുടെ നിയമപഠനം എറണാകുളം ലോ കോളജിലും മദ്രാസ് വിവേകാനന്ദ ലോ കോളജിലുമായിരുന്നു. പഠനകാലത്ത് കോളജ് യൂണിയന് ചെയര്മാനുമായിരുന്നു. ഇതിന്ശേഷം കേരള ഹൈക്കോടതിയിലും എറണാകുളത്തെ വിവിധ കോടതികളിലും അറുപത് വര്ഷത്തിലേറെ പ്രാക്ടീസ് ചെയ്തിട്ടുണ്ട്. സുപ്രധാനമായ പല സിവില് വിധികളിലും അദ്ദേഹം ഭാഗമായിരുന്നു. യോഗക്ഷേമസഭയുടെ സംസ്ഥാന പ്രസിഡന്റും ഇടപ്പള്ളി ഉപസഭയുടെ സ്ഥാപക പ്രസിഡന്റുമായിരുന്നു. ഊരാണ്മ ദേവസ്വം പ്രസിഡന്റായും ഏറെക്കാലം പ്രവര്ത്തിച്ച അദ്ദേഹം മികച്ച പ്രാസംഗികനുമായിരുന്നു.
ഭാര്യ: ഒളപ്പമണ്ണ മനയിലെ പരേതയായ ശാന്ത തമ്പുരാട്ടി. മക്കള്: പ്രദീപ് രാജ (റീജിയണല് ഹെഡ്, എവിഎല് ഇന്ത്യ, ചെന്നൈ), ഉഷ. മരുമക്കള്: ദ്വിജ (പൂളമണ്ണ മന), സുബ്രഹ്മണ്യന് നമ്പൂതിരി (കുവൈറ്റ്, കൂടല്ലൂര് മന). സഹോദരങ്ങള്: വി. ദാമോദര രാജ, ഡോ. സുബ്രഹ്മണ്യ രാജ, പരേതരായ വി. വാസുദേവ രാജ, വി. ഗണപതി രാജ, വി. നാരായണരാജ, ശ്രീദേവി (പാണയ്ക്കാട്ട് മന), ഉമാദേവി (അത്തിപ്പറ്റമന). ഇടപ്പള്ളി ഗണപതിക്ഷേത്രത്തിലെ നാലുകെട്ടില് തിങ്കളാഴ്ച രാവിലെ 11.45ഓടെ പൊതുദര്ശനം നടന്നു. യോഗക്ഷേമസഭയ്ക്കു വേണ്ടി സംസ്ഥാന പ്രസിഡന്റ് അഡ്വ. പി.എന്.ഡി. നമ്പൂതിരി, ശ്രീശങ്കരാ ട്രസ്റ്റിനു വേണ്ടി എക്സിക്യൂട്ടീവ് അംഗം പി.വി. കൃഷ്ണന് കുറൂര്, എന്എസ്എസ് കരയോഗത്തിന്റെ വിവിധ ശാഖകള്, മഹിളാ സമാജം തുടങ്ങിയവര് റീത്ത് സമര്പ്പിച്ചു. സംസ്കാരം രാത്രിയോടെ ഇടപ്പള്ളി കൊട്ടാരവളപ്പില് നടന്നു.
