കോട്ടയം: നടിയെ ആക്രമിച്ച കേസില് അപ്പീല് പോകുമെന്ന റിട്ട. ഡിജിപി ബി. സന്ധ്യയുടെ പ്രഖ്യാപനത്തിനെതിരെ പരക്കെ വിമര്ശനം. എഡിജിപിയായിരിക്കെ ദിലീപിനെതിരെ ഗൂഢാലോചനക്കുറ്റം ചാര്ത്താന് കരുതിക്കൂട്ടി ശ്രമിച്ചുവെന്ന ആക്ഷേപം നിലനില്ക്കെയാണ് കേസില് വിധി വന്നയുടന് അപ്പീല് പോകുമെന്ന പ്രഖ്യാപനവുമായി സന്ധ്യ രംഗത്തുവന്നത് . നിലവില് സര്വീസിലില്ലാത്ത സന്ധ്യ ഇത്തരമൊരു നിലപാടു പ്രഖ്യാപിച്ചത് എന്ത് അധികാരത്തിന്റെ പേരിലാണെന്നാണ് ഉയരുന്ന ചോദ്യം. ഇടതു പക്ഷ സഹയാത്രികയായി അറിയപ്പെടുന്ന സന്ധ്യ ഫയര് ഫോഴ്സ് മേധാവിയായാണ് സര്വീസില് നിന്ന് വിരമിച്ചത്. നടിയെ ആക്രമിച്ച കേസില് ആദ്യഘട്ടത്തില് അന്വേഷണ മേല്നോട്ടം സന്ധ്യയ്ക്കായിരുന്നു. നടിയെ ബലാല്സംഗം ചെയ്ത പള്സര് സുനിയുടെ മൊഴിയുടെ ബലത്തില് ദിലീപിനെ പ്രതി ചേര്ത്തത് സന്ധ്യയാണ്. എന്നാല് നിലവില് സര്ക്കാരിന്റെയോ, വാദിഭാഗത്തിന്റെയോ ഭാഗമല്ലാത്ത സന്ധ്യ അപ്പീല് പ്രഖ്യാപിച്ചതാണ് അത്ഭുതപ്പെടുത്തുന്നത്.
അതേസമയം അപ്പീല് നല്കുന്നതിനെക്കുറിച്ച് സര്ക്കാര് തീരുമാനമെടുക്കും മുന്പ് മുഖ്യമന്ത്രിയെ സമ്മര്ദ്ദത്തിലാക്കാനാണ് മുന്കൂട്ടി ഇത്തരമൊരു പ്രഖ്യാപനം സന്ധ്യ നടത്തിയതെന്നു വിലയിരുത്തപ്പെടുന്നു. അപ്പീല് നല്കുന്നതില് നിന്ന് സര്ക്കാര് പിന്നോട്ടു പോകാതിരിക്കാനുള്ള തടയിടലാണ് അവര് നടത്തിയതെന്നാണ് നിഗമനം.
സര്വീസിലില്ലെന്ന് ബി. സന്ധ്യ മറന്നു, അപ്പീല് പ്രഖ്യാപനം മുഖ്യമന്ത്രിയെ സമ്മര്ദ്ദത്തിലാക്കാനോ?
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.