ന്യൂദല്ഹി: മുസ്ലിം ന്യൂനപക്ഷത്തെ പ്രീണിപ്പിച്ചുകൊണ്ടിരിക്കുകയും ഹിന്ദു സമുദായത്തിനോട് താല്പര്യമുണ്ടെന്ന് അഭിനയിക്കുകയും ചെയ്തുകൊണ്ടിരുന്ന മമതയുടെ ഡബിള് റോള് പൊളിഞ്ഞു. ബംഗാളിലെ മൂര്ഷിദാബാദില് ബാബറി മസ്ജിദ് പണിയുന്നതിനായി തറക്കല്ലിട്ട ഹൂമയൂണ് കബീല് എന്ന തൃണമൂല് എംഎല്എ മമത യുഗത്തിന് അന്ത്യം കുറിയ്ക്കുമെന്ന് രാഷ്ട്രീയനിരീക്ഷകര് പ്രവചിക്കുന്നു.
ബാബറി മസ്ജിദുമായി മുന്നോട്ട് പോകുന്ന ഹുമയൂണ് കബീറിനെ പാര്ട്ടിയില് നിന്നും സസ്പെന്റ് ചെയ്തതുകൊണ്ടൊന്നും മമതയ്ക്ക് മുഖം രക്ഷിക്കാനാകില്ലെന്നാണ് വിലയിരുത്തല്. ബംഗാളിലെ മൂര്ഷിദാബാദിലെ ബെല്ഡംഗയില് ഡിസംബര് ആറിനാണ് ഹുമയൂണ് കബീര് പുതിയൊരു ബാബറി മസ്ജിദ് പണിയാന് തറക്കല്ലിട്ടത്. ഈ പദ്ധതിയെ തള്ളിക്കളഞ്ഞിരിക്കുകയാണ് മമത. എങ്കിലും പാടെ പുറംതിരിഞ്ഞുനിന്നാല് മമത മോദിയുടെ ആളായി മുസ്ലിം സമുദായത്തിനിടയില് മുദ്രകുത്തപ്പെടും. അത് മമതയുടെ ബംഗാളിലെ പ്രധാന മുസ്ലിം വോട്ട് ബാങ്കില് വിള്ളലുണ്ടാക്കും. നാലാമതും ബംഗാള് ഭരിയ്ക്കാമെന്ന് മമത കരുതേണ്ടെന്നും മമതയുടെ മുസ്ലിം വോട്ട് ബാങ്ക് തകര്ന്നുവെന്നുമാണ് ഹുമയൂണ് കബീര് ഭീഷണി മുഴക്കിയിരിക്കുന്നത്. ഡിസംബര് 22ന് സ്വന്തം പാര്ട്ടി രൂപീകരിക്കുമെന്നും അസദുദ്ദീന് ഒവൈസിയുടെ എഐഎംഐഎമ്മുമായി കൂട്ടുമുന്നണിയുണ്ടാക്കുമെന്നും ഭീഷണി മുഴക്കിയിരിക്കുകയാണ് ഹുമയൂണ് കബീര്.
മമതയുടെ മുസ്ലിം പ്രീണനം സഹിക്കാനാകാതെ മമതയുടെ പരമ്പരാഗത ഹിന്ദു വോട്ടര്മാരില് നല്ലൊരു ശതമാനം മമതയ്ക്കെതിരെ തിരിഞ്ഞുകഴിഞ്ഞു. എന്തായാലും ബാബറിമസ്ജിദ് പണിയാനുള്ള പ്രവര്ത്തനങ്ങളെ തള്ളിക്കളഞ്ഞില്ലെങ്കില് മമതയ്ക്ക് അനുകൂലമായുള്ള ഹിന്ദുവോട്ടുകളും നഷ്ടപ്പെടും എന്നതാണ് സ്ഥിതി. അയോധ്യയില് ബാബ്റി മസ്ജിദ് തകര്ന്നതിന് 33 വര്ഷത്തിന് ശേഷം ബംഗാളില് ബാബ്റി മസ്ജിദ് പണിയാന് തറക്കല്ലിട്ടത് ഹിന്ദുസമുദായത്തിനുള്ളില് ഭീതി ഉണ്ടാക്കിയിട്ടുണ്ട്. എന്തായാലും മമതയുടെ കപട മതേതരമുഖമാണ് ഹുമയൂണ് കബീര് എന്ന തൃണമൂല് എംഎല്എയുടെ ബാബറി മസ്ജിദ് പദ്ധതിയിലൂടെ തകരുന്നത്. ഇതോടെ 2026ലെ നിയമസഭാ തെരഞ്ഞെടുപ്പില് മമത യുഗത്തിന് അന്ത്യം കുറിക്കപ്പെടുമെന്ന് രാഷ്ട്രീയനിരീക്ഷകര് പ്രവചിക്കുന്നത്.
സിപിഎം നേതൃത്വത്തിലുള്ള കമ്മ്യൂണിസ്റ്റ് സര്ക്കാരിന്റെ 34 വര്ഷത്തെ ഭരണം തൂത്തെറിഞ്ഞ് 2011ല് ആണ് മമത ബംഗാളില് അധികാരത്തില് വന്നത്. ഇപ്പോള് 15 വര്ഷം പൂര്ത്തിയാക്കാറായി. 2026ല് മമതയുടെ അവസാനമാകുമെന്നാണ് കരുതപ്പെടുന്നത്.
