ചെന്നൈ: വിജയ്യുടെ പാര്ട്ടിയായ ടിവികെ 16ന് ഈറോഡ് നടത്താന് നിശ്ചയിച്ച റാലിക്ക് പോലീസ് അനുമതി നല്കിയില്ല. ഈറോഡ് പെരുന്തുറൈ റോഡിലെ ഗ്രൗണ്ടില് റാലി നടത്താനാണ് അനുമതി തേടിയത്. സ്ഥലം സന്ദര്ശിച്ചതിനു ശേഷം അനുമതിയില്ലെന്ന് പോലീസ് സൂപ്രണ്ട് എ. സുജാത അറിയിക്കുകയായിരുന്നു.
എഴുപതിനായിരം പേരെ പ്രതീക്ഷിക്കുന്നതായാണ് ടിവികെ അറിയിച്ചത്. വന് ജനക്കൂട്ടമുണ്ടാകുമെന്നതും വാഹനങ്ങള് പാര്ക്ക് ചെയ്യാന് മതിയായ സ്ഥലമില്ലെന്നതും പരിഗണിച്ചാണ് അനുമതി നിഷേധം. ആദ്യം റോഡ് ഷോ നടത്താനായിരുന്നു ടിവികെ പദ്ധതി. പിന്നീട് ഇത് സ്വകാര്യ സ്ഥലത്ത് നിയന്ത്രണങ്ങളോടെയുള്ള റാലിയാക്കി മാറ്റി അനുമതി തേടുകയായിരുന്നു. ടിവികെയില് ചേര്ന്ന മുന് എഐഎഡിഎംകെ മന്ത്രി സെങ്കോട്ടയ്യന്റെ ശക്തികേന്ദ്രമാണ് ഈറോഡ്. തന്റെ ജനപിന്തുണ കാണിക്കാനുള്ള അവസരമായാണ് സെങ്കോട്ടയ്യന്റെ നേതൃത്വത്തില് റാലിക്ക് ഒരുങ്ങിയത്.
നാളെ വിജയ് പുതുച്ചേരിയില് നടത്തുന്ന റാലിക്ക് പോലീസ് പുതിയ നിബന്ധനകള് നല്കി. 41 പേര് കൊല്ലപ്പെട്ട കരൂര് ദുരന്തത്തിന് ശേഷം വിജയ്യുടെ പാര്ട്ടി നടത്തുന്ന ആദ്യ റാലിയാണിത്.
