കൊല്ലം: കൊട്ടിയത്ത് ദേശീയപാത തകര്ന്ന സംഭവത്തില് കേന്ദ്ര സര്ക്കാരിന്റെ കടുത്ത നടപടി. നിര്മാണക്കമ്പനിയായ ആന്ധ്രാപ്രദേശ് ആസ്ഥാനമായുള്ള ശിവാലയ കണ്സ്ട്രക്ഷന്സിന് ഒരു മാസത്തേക്ക് വിലക്കേര്പ്പെടുത്തി. കരിമ്പട്ടികയില് ഉള്പ്പെടുത്താതിരിക്കാന് കാരണമുണ്ടെങ്കില് ഒരു മാസത്തിനകം അറിയിക്കാന് ദേശീയപാത അതോറിറ്റി നോട്ടീസ് നല്കി. വിദഗ്ധ പരിശോധനാ റിപ്പോര്ട്ടിന്റെ അടിസ്ഥാനത്തിലാണ് നടപടി.
ദേശീയപാതയില് കൊട്ടിയം മൈലക്കാട് ഉയരപ്പാതയുടെ നിര്മ്മാണം നടക്കുന്ന സ്ഥലത്താണ് വെള്ളിയാഴ്ച വൈകിട്ട് അപകടം ഉണ്ടായത്. പ്രധാനപാതയുടെ സംരക്ഷണഭിത്തി താഴെ സര്വീസ് റോഡിലേക്ക് ഇടിഞ്ഞുതാഴ്ന്നു. കൂറ്റന് കോണ്ക്രീറ്റ് സ്ലാബുകള് വീണ് സര്വീസ് റോഡും തകര്ന്നു. സ്കൂള് ബസ് അടക്കം കടന്നുപോയ സമയത്തുണ്ടായ അപകടത്തില് തലനാരിഴയ്ക്കാണ് വന് ദുരന്തം ഒഴിവായത്.
റോഡ് തകര്ന്ന വിഷയം ചര്ച്ച ചെയ്യാന് കളക്ടറേറ്റില് ചേര്ന്ന യോഗത്തില് ദേശീയപാത അതോറിറ്റിയുടെ ഉന്നത ഉദ്യോഗസ്ഥരും പങ്കെടുത്തു. നിര്മ്മാണ കമ്പനികള്ക്ക് വന്വീഴ്ചയുണ്ടായതായി സംഭവസ്ഥലം സന്ദര്ശിച്ച കാണ്പൂര് ഐഐടി പ്രൊഫസര് ഉള്പ്പെടുന്ന, ദേശീയപാത അതോറിറ്റിയുടെ വിദഗ്ധ സംഘം വിലയിരുത്തി. മണ്ണ് പരിശോധനയും കൃത്യമായ രീതിയില് ക്വാളിറ്റി പരിശോധനയും നടത്താതിരുന്നതും വീഴ്ച്ചയ്ക്ക് കാരണമായെന്ന് വിദഗ്ധ സംഘം പറയുന്നു. കരാര് കമ്പനിയുടെ പ്രൊജക്ട് മാനേജരെയും റസിഡന്റ് എഞ്ചിനീയറെയും ഇതിനോടകം മാറ്റിയിട്ടുണ്ട്.
