ആലപ്പുഴ: തദ്ദേശ തെരഞ്ഞെടുപ്പിന്റെ പരസ്യപ്രചാരണം നാളെ വൈകിട്ടോടെ സമാപിക്കും. മുന്നണികള് പ്രചാരണത്തിന്റെ അവസാനലാപ്പില് മുന്നേറാനുള്ള കഠിന ശ്രമത്തില്. പ്രചാരണത്തിന്റെ അവസാനദിവസങ്ങളിലെ അടിയൊഴുക്കുകളിലാണ് തെരഞ്ഞെടുപ്പ് ഫലം പലപ്പോഴും നിശ്ചയിക്കുക.
മൂന്നു മുന്നണികളും കടുത്ത പോരാട്ടം കാഴ്ചവെക്കുന്ന വാര്ഡുകളില് നാമമാത്രമായ വോട്ടുകളാണ് ജയം സമ്മാനിക്കുക. അതിനാല് തന്നെ അവസാനവോട്ടറേയും നേരില് കണ്ട് വോട്ട് ഉറപ്പിക്കാനുള്ള ശ്രമത്തിലാണ് സ്ഥാനാര്ത്ഥികളും പ്രവര്ത്തകരും. കുപ്രചാരണങ്ങളും, അടവുകളും ഒക്കെ പയറ്റുന്നതും പ്രചാരണത്തിന്റെ അവസാനദിനങ്ങളിലാണ്. അതിനാല് എതിര് സ്ഥാനാര്ത്ഥികളെയും പ്രവര്ത്തകരെയും നിരീക്ഷിക്കാനും പ്രത്യേക സ്ക്വാഡുകളെ പോലും നിയോഗിക്കുന്നു.
മുന് കാലങ്ങളെ അപേക്ഷിച്ച് ബഹുഭൂരിപക്ഷം വാര്ഡുകളിലും ത്രികോണ പോരാട്ടമാണ് നടക്കുന്നത്. പരമ്പരാഗതമായി ഇടതുവലതു മുന്നണികളുടെ പോരാട്ടം നടക്കുന്ന പ്രദേശങ്ങളില് ഇത്തവണ കാര്യങ്ങള് വ്യത്യസ്ഥമാണ്. എന്ഡിഎ പ്രബല ശക്തിയായി മാറി കഴിഞ്ഞു. കഴിഞ്ഞ ലോക്സഭാ തെരഞ്ഞെടുപ്പില് ഇടതുവലതു മുന്നണികളെ മറികടക്കുന്ന പ്രകടനമാണ് എന്ഡിഎ കാഴ്ചവെച്ചത്.
തദ്ദേശതെരഞ്ഞെടുപ്പില് നഗര, ഗ്രാമഭേഗദമന്യേ എന്ഡിഎ അതിശക്തമായ പ്രചാരണമാണ് നടത്തിയത്. പലയിടങ്ങളിലും ഇരുമുന്നണികളെയും മറികടക്കുകയും ചെയ്തു. ശബരിമല സ്വര്ണ കവര്ച്ച, വികസന മുരടിപ്പ് തുടങ്ങി ഇടതുപക്ഷം നിരവധി ചോദ്യങ്ങളാണ് വോട്ടര്മാരില് നിന്ന് അഭിമുഖീകരിക്കുന്നത്. യൂത്ത്കോണ്ഗ്രസ് സംസ്ഥാന അദ്ധ്യക്ഷനായിരുന്ന രാഹൂല് മാങ്കൂട്ടത്തിലിനെതിരായ ബലാല്സംഗ കേസുകളും, വെല്ഫയര്പാര്ട്ടിയടക്കമുള്ള മതതീവ്രവാദ സംഘടനകളുമായുള്ള അവിശുദ്ധ സഖ്യവും യുഡിഎഫിന് വെല്ലുവിളിയാകുന്നു. പതിവ് പോലെ കോണ്ഗ്രസിനുള്ളിലും മുന്നണിയിലും റിബല് ശല്യവും രൂക്ഷമാണ്. മുന്ന് മൂന്നണികളും അവസാനത്തെ ആയൂധവും പ്രയോഗിക്കുമ്പോള് മത്സരം ഫോട്ടോഫിനിഷിലേക്ക് കടക്കുന്നു.
