കൊച്ചി: സംസ്ഥാനത്ത് വേനല്ക്കാലത്തും (പ്രീമണ്സൂണ്) തുലാമഴ സീസണിലും(പോസ്റ്റ് മണ്സൂണ്) വേഗത്തില് രൂപപ്പെടുന്ന കൂമ്പാരമേഘങ്ങള് സംയുക്ത കാലാവസ്ഥ ഭീഷണികള്ക്ക് കാരണമാകുന്നതായി കുസാറ്റ് പഠനം. മിന്നല്, പെട്ടെന്ന് വീശിയടിക്കുന്ന ശക്തമായ കാറ്റ്, കനത്ത മഴ എന്നീ മൂന്ന് പ്രതിഭാസങ്ങളാണ് ഈ സമയങ്ങളില് പ്രധാനമായും സംസ്ഥാനത്ത് നാശം വിതയ്ക്കുന്നതെന്നാണ് പുതിയ പഠനം. കുസാറ്റിലെ അഡ്വാന്സ്ഡ് സെന്റര് ഫോര് അറ്റ്മോസ്ഫെറിക് റഡാര് റിസര്ച്ച് ഡയറക്ടര് ഡോ. അഭിലാഷ് എസ്, കൃഷ്ണകുമാര് ഇ.കെ, അഭിരാം നിര്മല് സി.എസ്, പ്രഭാത് എച്ച്. കുറുപ്പ് എന്നിവര് ചേര്ന്നാണ് പഠനം നടത്തിയത്.
ഇടിമിന്നലോടുകൂടിയ ഇത്തരം കോണ്വെക്റ്റീവ് സ്റ്റോം (സംവഹന കൊടുങ്കാറ്റ്) സംസ്ഥാനത്ത് സാധാരണമാണെങ്കിലും, പ്രീമണ്സൂണ് സീസണില് ഇവയുടെ ആവര്ത്തനവും ഇതിനൊപ്പം ബഹുമുഖ അപകടസാധ്യതയും വര്ദ്ധിച്ചുവരുന്നതായി പഠനം ചൂണ്ടിക്കാണിക്കുന്നു. ഈ മൂന്ന് പ്രതിഭാസങ്ങളും ആവര്ത്തിച്ച് അപകടങ്ങള്ക്ക് കാരണമാകുന്ന പ്രദേശങ്ങളെ ഗവേഷകര് വ്യക്തമായി മാപ്പ് ചെയ്തിട്ടുണ്ട്.
പഠനത്തിന്റെ കണ്ടെത്തലുകള് പ്രകാരം കോട്ടയം, എറണാകുളം, ഇടുക്കി, പത്തനംതിട്ട എന്നിവ ഇടിമിന്നല്, മഴ, കാറ്റ് എന്നീ അപകടസാധ്യത ഏറ്റവും കൂടുതലുള്ള ജില്ലകള്. ഈ ജില്ലകളില് ഇടവേളകളില് കൂമ്പാരമേഘങ്ങള് മൂലമുള്ള ഇടമിന്നലും കാറ്റും മഴയും നാശം വിതയ്ക്കാറുണ്ട്. ഇവിടങ്ങളില് ലഭിക്കുന്ന മഴയുടെ അളവ് കുറവാണ്. എറണാകുളം മുതല് വടക്കന് കേരളം വരെയുള്ള തീരപ്രദേശങ്ങളിലാണ് കൂമ്പാരമേഘങ്ങള് മൂലം തീവ്ര മഴ ലഭിക്കുന്നത്. ഇവ ആവര്ത്തിച്ച് സംഭവിക്കാറില്ലെന്നും പഠനം പറയുന്നു.
മധ്യ- തെക്കന് ജില്ലകളിലാണ് മിന്നല്, മഴ, ശക്തമായ കാറ്റ് എന്നിവ ഒരുമിച്ച് ഉണ്ടാക്കുന്ന സംയുക്ത കാലാവസ്ഥ ഭീഷണികള് കൂടുതലായി രേഖപ്പെടുത്തുന്നത്. ഇതുവഴി മിന്നല് പ്രളയം, ഉരുള്പൊട്ടല് തുടങ്ങിയ ദുരന്തങ്ങള്ക്ക് കൂടുതല് സാധ്യതയുണ്ടെന്നും ഈ ജില്ലകളില് ജാഗ്രത പുലര്ത്തണമെന്നും പഠനം സൂചിപ്പിക്കുന്നു.
കൂമ്പാരമേഘങ്ങള് കൊണ്ടുണ്ടാകുന്ന വ്യത്യസ്ത അപകടങ്ങള് കേരളത്തിലെ ഏത് ഭാഗങ്ങളില് കൂടുതലാണെന്ന് വ്യക്തമാക്കുന്ന ആദ്യ സമഗ്ര പഠനമാണിത്. ആഴത്തിലുള്ള ഉയര്ന്ന മേഘങ്ങള് പെട്ടെന്ന് രൂപപ്പെടുന്നതായും ശക്തമായ അടിക്കാറ്റുകള് ഇവ സൃഷ്ടിക്കുന്ന രീതിയെക്കുറിച്ചും പഠനം വിശദീകരിക്കുന്നുണ്ട്.
ഉപഗ്രഹ ചിത്രങ്ങള്, കേന്ദ്രകാലാവസ്ഥ വകുപ്പ്, മഴമാപിനി വിവരങ്ങള്, ഓട്ടോമാറ്റിക് വേതര് സ്റ്റേഷന് ഡാറ്റ തുടങ്ങിയവ ഉപയോഗിച്ചാണ് കേരളത്തിലെ പ്രധാന അപകട ഹോട്ട് സ്പോട്ടുകള് ഗവേഷകര് നിര്വചിച്ചത്. കൂമ്പാരമേഘങ്ങളുടെ രൂപീകരണവും തീവ്രതയും വിവിധ പ്രദേശങ്ങളില് എങ്ങനെ വ്യത്യാസപ്പെടുന്നു എന്നതും പഠനം വ്യക്തമാക്കുന്നു. പഠനത്തിന്റെ കണ്ടെത്തലുകള് ജിയോമാറ്റിക്സ് നാച്ചുറല് ഹസാര്ഡ് ആന്ഡ് റിസ്ക് എന്ന അന്താരാഷ്ട്ര ജേര്ണലില് പ്രസിദ്ധീകരിച്ചിട്ടുണ്ട്.
ജന്മഭൂമി ഓണ്ലൈന്