പാലക്കാട്: ലണ്ടന് സ്റ്റോക്ക് എക്സേഞ്ചില് 2100 കോടിയുടെ മസാല ബോണ്ടിറക്കിയതില് ഗുരുതര ക്രമക്കേടുണ്ടെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്.
മുഖ്യമന്ത്രിക്കെതിരായ ഇ ഡി സമന്സ് അന്വേഷണത്തിന്റെ ഭാഗമായാണെന്നും, ഇത് രാഷ്ട്രീയനീക്കമാണെന്ന് പറയുന്നത് ശുദ്ധമണ്ടത്തരമാണെന്നും അദ്ദേഹം വാര്ത്താസമ്മേളനത്തില് പറഞ്ഞു.
മസാല ബോണ്ടില് ഉത്തരമുണ്ടെങ്കില് ഇ ഡിയോട് പറയുകയാണ് വേണ്ടത്. ഒമ്പതര ശതമാനത്തിലധികം പലിശയ്ക്കാണ് മസാല ബോണ്ടിറക്കിയത്. ഫീസിനത്തില് ലഭിച്ച 21 കോടി ആര്ക്ക്, എപ്പോള്, എന്തിനുവേണ്ടി കൊടുത്തുവെന്ന് മുഖ്യമന്ത്രിയും ധനമന്ത്രിയും വ്യക്തമാക്കണം. ഇതരസംസ്ഥാനങ്ങളൊന്നും കൂടിയ പലിശനിരക്കില് മസാലബോണ്ട് എടുക്കുന്നില്ല. രാജ്യത്തെ വിവിധ ബാങ്കുകളില് നിന്നാണ് അവര് കുറഞ്ഞ പലിശയ്ക്ക് വായ്പയെടുക്കുന്നതെന്നും, എല്ലാം അന്വേഷിച്ച് കണ്ടെത്തണമെന്നും അദ്ദേഹം ആവശ്യപ്പെട്ടു. അന്വേഷണം തീരുമാനിക്കേണ്ടത് അന്വേഷണസംഘമാണ്. മുഖ്യമന്ത്രിക്കെതിരെ തുടരന്വേഷണം ഉണ്ടാകുമെന്നും ശബരിമല കൊള്ള പോലെയാണ് ഇതെന്നും അദ്ദേഹം കൂട്ടിച്ചേര്ത്തു.
രാഹുല് മാങ്കൂട്ടത്തിലിന്റെ പേരില് നേരത്തെ തന്നെ സ്വമേധയ കേസെടുക്കേണ്ടിയിരുന്നതാണ്. എന്നാലിപ്പോള് തെരഞ്ഞെടുപ്പിന്റെ പശ്ചാത്തലത്തില് കേസെടുത്തത് സ്വര്ണക്കൊള്ള മറയ്ക്കാനുള്ള നാടകമാണെന്നും അദ്ദേഹം കൂട്ടിച്ചേര്ത്തു. മോശം വ്യക്തിയാണെന്ന് കോണ്ഗ്രസ് നേതൃത്വത്തിന് അറിയാമായിരുന്നിട്ടും മാങ്കൂട്ടത്തിലിനെ പാലക്കാട്ടെ ജനങ്ങളുടെ തലയില് കെട്ടിവയ്ക്കുകയായിരുന്നു. സ്വര്ണക്കൊള്ളയില് കോണ്ഗ്രസിനും പങ്കുണ്ട്. ഉണ്ണികൃഷ്ണന് പോറ്റിയെ അവിടെയെത്തിച്ചത് കോണ്ഗ്രസാണ്. അഴിമതിയുടെ കാര്യത്തില് എല്ഡിഎഫും യുഡിഎഫും മത്സരിക്കുകയാണ്. ശബരിമല കൊള്ള പുറത്തുവന്നപ്പോള് ഇതൊരു വീഴ്ചയാണെന്നാണ് മുഖ്യമന്ത്രി ആദ്യം പറഞ്ഞത്.
വിവാദങ്ങളല്ല വികസനമാണ് ബിജെപിയുടെ രാഷ്ട്രീയം. മാറിമാറി ഭരിച്ച എല്ഡിഎഫും യുഡിഎഫും അഴിമതിയും, ജനങ്ങളെ ചൂഷണം ചെയ്യലും മാത്രമാണ് ചെയ്തിട്ടുള്ളത്. അഴിമതിയായിരുന്നു കോണ്ഗ്രസിന്റെ കുത്തകയെങ്കില് അക്രമരാഷ്ട്രീയവും അഴിമതിയുമാണ് സിപിഎമ്മിന്റെ കുത്തകയെന്ന് രാജീവ് ചന്ദ്രശേഖര് പറഞ്ഞു. പത്രസമ്മേളനത്തില് സംസ്ഥാന വൈസ് പ്രസിഡന്റുമാരായ സി. കൃഷ്ണകുമാര്, അഡ്വ. കെ.കെ. അനീഷ്കുമാര്, വി. ഉണ്ണികൃഷ്ണന്, പാലക്കാട് ഈസ്റ്റ് ജില്ലാ പ്രസിഡന്റ് പ്രശാന്ത് ശിവന് എന്നിവരും പങ്കെടുത്തു.
