തൃശൂര്‍ : വരന്തരപ്പിള്ളിയില്‍ ഗര്‍ഭിണി തീ കൊളുത്തി മരിച്ച സംഭവത്തില്‍ ഭര്‍തൃമാതാവിനെ പൊലീസ് അറസ്റ്റ് ചെയ്തു.നന്തിപുലം മാട്ടുമല മാക്കോത്ത് രജനി (49) ആണ് അറസ്റ്റിലായത്.
പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.നേരത്തെ,അര്‍ച്ചനയുടെ പിതാവിന്റെ പരാതിയില്‍ ഭര്‍ത്താവ് ഷാരോണിനെ പൊലീസ് അറസ്റ്റ് ചെയ്തിരുന്നു. സ്ത്രീധന പീഡന വകുപ്പുകള്‍ ചുമത്തിയാണ് അറസ്റ്റ് രേഖപ്പെടുത്തിയത്.
നവംബര്‍ 26 ന് വൈകിട്ട് നാല് മണിയോടെയാണ് രജനിയുടെ മകന്‍ ഷാരോണിന്റെ ഭാര്യ അര്‍ച്ചന (20) യെ വീടിനോട് ചേര്‍ന്നുള്ള കനാലില്‍ ദേഹത്ത് മണ്ണെണ്ണ ഒഴിച്ച് തീ കൊളുത്തി പൊള്ളലേറ്റ് മരിച്ച നിലയില്‍ കണ്ടെത്തിയത്. അര്‍ച്ചന അഞ്ച് മാസം ഗര്‍ഭിണി ആയിരുന്നു.
പ്രണയത്തിലായിരുന്ന ഷാരോണും അര്‍ച്ചനയും ആറ് മാസം മുമ്പാണ് വിവാഹിതരായത്.വീട്ടുകാരുമായി സംസാരിക്കാന്‍ പോലും അര്‍ച്ചനയെ ഷാരോണ്‍ അനുവദിച്ചിരുന്നില്ല. കോളേജിനു മുന്നില്‍വെച്ച് ഒരിക്കല്‍ അര്‍ച്ചനയെ മര്‍ദിച്ചപ്പോള്‍ സെക്യൂരിറ്റി ജീവനക്കാരന്‍ ഇടപെട്ടാണ് രക്ഷിച്ചത്. വീട്ടില്‍ വഴക്ക് പതിവായിരുന്നുവെന്ന് അര്‍ച്ചനയുടെ ബന്ധുക്കള്‍ പറഞ്ഞു.
