വൈക്കം മഹാദേവ ക്ഷേത്രത്തിലെ പ്രസിദ്ധമായ അഷ്ടമി ഉത്സവത്തിന് തിങ്കളാഴ്ച കൊടിയേറും

കോട്ടയം: വൈക്കം മഹാദേവ ക്ഷേത്രത്തിലെ അഷ്ടമി ഉത്സവത്തിന് തിങ്കളാഴ്ച കൊടിയേറും. രാവിലെ 6.30 നും 7.30 നും മദ്ധ്യേ തന്ത്രിമാരായ ഭദ്രകാളി മറ്റപ്പള്ളി നാരായണന്‍ നമ്പൂതിരി, കിഴക്കിനിയേടത്ത് മേക്കാട് മാധവന്‍ നമ്പൂതിരി എന്നിവരുടെ കാര്‍മ്മികത്വത്തിലാണ് കൊടിയേറ്റുക.
പ്രസിദ്ധമായ വൈക്കത്തഷ്ടമി 12നാണ്. അഷ്ടമി ദര്‍ശനം വെളുപ്പിന് 4.30 നും ഉദയനാപുരത്തപ്പന്റെ വരവ്, അഷ്ടമി വിളക്കും രാത്രി 10 നുമാണ്. 13ന് വൈകിട്ട് 5നാണ് ആറാട്ട്. 14 ന് രാവിലെ 11ന് മുക്കുടി നിവേദ്യം.
സംയുക്ത എന്‍.എസ്.എസ് കരയോഗങ്ങള്‍ ഞായറാഴ്ച കുലവാഴപ്പുറപ്പാട് നടത്തി. കൊടിയേറ്ററിയിപ്പും ഞായറാഴ്ച നടന്നു. വിശേഷാല്‍ ചടങ്ങുകള്‍ക്ക് ശേഷം ആചാരപ്രകാരംഅവകാശിയായ മൂസത് ഓലക്കുട ചൂടി ചമയങ്ങളില്ലാത്ത ആനപ്പുറത്തെഴുന്നള്ളി ഉദയനാപുരം ക്ഷേത്രത്തില്‍ കൊടിയേറ്ററിയിച്ചു.
അഷ്ടമിയോടനുബന്ധിച്ച് വടക്കേനടയിലെ കൊച്ചാലുംചുവട് ഭഗവതി സന്നിധാനത്തില്‍ നടത്തുന്ന പ്രത്യേക പൂജകള്‍ ആരംഭിച്ചു.