കൊൽക്കത്ത: സമൂഹ മാധ്യമങ്ങളിലൂടെയുള്ള അധിക്ഷേപ പരാമർശം ചൂണ്ടിക്കാട്ടി പ്രശസ്ത ഒഡീസി നർത്തകിയും മുൻ ഇന്ത്യൻ ക്രിക്കറ്റ് താരം സൗരവ് ഗാംഗുലിയുടെ ഭാര്യയുമായ ഡോണ ഗാംഗുലി പോലീസിൽ പരാതി നൽകി. കൊൽക്കത്ത ഫിലിം ഫെസ്റ്റിവലിൽ തന്റെ നൃത്ത പ്രകടനവുമായി ബന്ധപ്പെട്ട് ഫെയ്സ്ബുക്ക് പേജിൽ അധിക്ഷേപകരമായ പോസ്റ്റുകൾ പ്രത്യക്ഷപ്പെട്ടതായും ഇതിനു പിന്നിൽ പ്രവർത്തിച്ചവരെ പിടികൂടണമെന്നും പരാതിയിൽ ആവശ്യപ്പെടുന്നു.
ഠാക്കൂർപുക്കൂർ പോലീസ് സ്റ്റേഷനിൽ ഡോണ ഗാംഗുലി നൽകിയ പരാതിയിൽ പോലീസ് അന്വേഷണം ആരംഭിച്ചു. ശരീരാധിക്ഷേപം നടത്തിയതായും സൽപ്പേരിന് കളങ്കമുണ്ടാക്കിയെന്നും പരാതിയിൽ സൂചിപ്പിക്കുന്നു. ബുധനാഴ്ച വൈകീട്ടാണ് പരാതി നൽകിയത്. പരാമർശങ്ങളുടെ സ്കീൻ ഷോട്ടുകളും മൊബൈൽ നമ്പറുകളും നൽകിയതായി പോലീസ് അറിയിച്ചു.
പരാതിയിൽ ഉന്നയിച്ച ആളുകളെ കേന്ദ്രീകരിച്ചുകൊണ്ടുള്ള അന്വേഷണം നടന്നുവരികയാണെന്ന് പോലീസ് അറിയിച്ചു.
