കൊച്ചി: നടിയെ ആക്രമിച്ച കേസിലെ വിചാരണ നടപടികള് പ്രസിദ്ധീകരിക്കുന്നതിനുള്ള വിലക്ക് മാധ്യമങ്ങള് ലംഘിച്ചതിനെതിരെ ദിലീപ് നല്കിയ ഹര്ജിയിലെ ഉത്തരവിന്റെ അടിസ്ഥാനത്തില് രജിസ്റ്റര് ചെയ്ത അഞ്ച് എഫ്ഐആറുകളിലെ പുരോഗതി അറിയിക്കാന് ഹൈക്കോടതി സര്ക്കാരിന് നിര്ദേശം നല്കി. 2022 ജനുവരിയിലെ കോടതി ഉത്തരവിന്റെ അടിസ്ഥാനത്തില് എഫ്ഐആറുകള് രജിസ്റ്റര് ചെയ്തുവെങ്കിലും ഒരു അന്വേഷണവും നടത്തിയിട്ടില്ലെന്ന് ദിലീപിന്റെ അഭിഭാഷകന് കോടതിയെ അറിയിച്ചു. വിചാരണ നടപടികള് പൂര്ത്തിയായതിനാല് ഈ ഹര്ജിക്ക് ഇനി പ്രസക്തിയില്ലെന്ന് കോടതി ചൂണ്ടിക്കാട്ടി. എന്നാല് കോടതി ഉത്തരവിനെത്തുടര്ന്നുള്ള കേസുകള്ക്ക് സ്വാഭാവികമായ അന്ത്യം വേണമല്ലോ എന്ന് ദിലീപിന്റെ അഭിഭാഷകന് അഭിപ്രായപ്പെട്ടു. ഇതേത്തുടര്ന്നാണ് എഫ്ഐആറുകളിലെ പുരോഗതി അറിയിക്കാന് ഹൈക്കോടതി സര്ക്കാരിന് നിര്ദേശം നല്കിയത്. സര്ക്കാര് ഇതിനു സമയം തേടിയതിനാല്, കേസ് അടുത്ത ആഴ്ചത്തേക്ക് മാറ്റി.
ദിലീപ് എട്ടാം പ്രതിയായ നടിയെ ആക്രമിച്ച കേസ് എറണാകുളം പ്രിന്സിപ്പല് സെഷന്സ് കോടതി ഡിസംബര് 8 ന് വിധി പറയാന് വച്ചിരിക്കുകയാണ്.
















