തിരുവനന്തപുരം: ഹിന്ദുത്വത്തെ അവഹേളിക്കുന്നതില് മുന്നില് നില്ക്കുന്ന സംസ്ഥാനമാണ് കേരളമെന്ന് ഗോവ മുന് ഗവര്ണര് പി.എസ്. ശ്രീധരന്പിള്ള. വിവാദങ്ങളിലേക്ക് വലിച്ചെറിയാനാണ് പലപ്പോഴും ശ്രമിച്ചുകൊണ്ടിരുന്നത്.
ദേശീയ നിയമ ദിനത്തോടനുബന്ധിച്ച് ഭാരതീയ അഭിഭാഷക പരിഷത്തിന്റെ നേതൃത്വത്തില് ഭരണഘടനയിലെ സാംസ്കാരിക ദേശീയത എന്ന വിഷയത്തില് തിരുവനന്തപുരം ബാര് അസോസിയേഷന് ഹാളില് സംഘടിപ്പിച്ച സെമിനാര് ഉദ്ഘാടനം ചെയ്യുകയായിരുന്നു അദ്ദേഹം.
ഹിന്ദുത്വം എന്നത് ഭാരതത്തിന്റെ സാംസ്കാരിക ദേശീയതയാണ്. അതൊരു മതമല്ല, ജീവിത രീതിയാണെന്നാണ് സുപ്രീംകോടതി പറഞ്ഞത്. 1995 ലെ മൂന്നംഗ ബെഞ്ചിന്റെ വിധിയെ ഖണ്ഡിക്കാന് മൂന്ന് ഹര്ജികള് വന്നെങ്കിലും ഇന്നുവരെ സുപ്രീംകോടതി ആ വിധിയെ തള്ളിക്കളഞ്ഞിട്ടില്ല.
യതോ ധര്മ സ്തതോ ജയ എന്ന സുപ്രീംകോടതിയുടെ ആപ്തവാക്യം മഹാഭാരതത്തില് നിന്നെടുത്തതാണ്. പാര്ലമെന്റിനോ സുപ്രീംകോടതിക്കോ ഗവര്ണര്ക്കോ മന്ത്രിമാര്ക്കോ അല്ല പരമാധികാരം, ജനങ്ങള്ക്കാണ് പരമാധികാരം എന്നാണ് ഭാരതീയ ഭരണഘടന വിഭാവനം ചെയ്യുന്നത്. ക്രിയേറ്റീവ് മൈനോറിറ്റിയാണ് സമൂഹത്തില് മാറ്റം കൊണ്ടുവരുന്നത്. ആ മൈനോറിറ്റിയില് ഉള്പ്പെടുന്നവരാണ് അഭിഭാഷകര് എന്ന ചിന്ത ഉണ്ടാകണമെന്നും അദ്ദേഹം പറഞ്ഞു.
ഭാരതീയ അഭിഭാഷക പരിഷത്ത് ജില്ലാ പ്രസിഡന്റ് അഡ്വ. ജി.കെ. പ്രദീപ്കുമാര് അധ്യക്ഷനായി. നാഷണല് കൗണ്സില് അംഗം അഡ്വ. വെള്ളായണി കെ.എസ്. രാജഗോപാല്, സംസ്ഥാന സെക്രട്ടറി അഡ്വ. അണിയൂര് ടി. അജിത്കുമാര്, സംസ്ഥാന സമിതി അംഗം അഡ്വ. ഗീതാകുമാരി, ജില്ല വൈസ് പ്രസിഡന്റ് അഡ്വ. എം.എസ്. ശങ്കരന്കുട്ടി, ജില്ല സെക്രട്ടറി അഡ്വ. അജിത് വഴയില എന്നിവര് സംസാരിച്ചു.
