തിരുവനന്തപുരം: ശബരിമല തീര്ത്ഥാടനവുമായി ബന്ധപ്പെട്ട് ഡ്യൂട്ടിയിലുള്ള ജീവനക്കാര്ക്ക് വോട്ട് നിഷേധിക്കരുതെന്ന് എന്ജിഒ സംഘ്. തദ്ദേശ സ്വയംഭരണ തെരഞ്ഞെടുപ്പിന്റെ വോട്ടെടുപ്പ് ദിവസങ്ങളായ ഡിസംബര് 9, 11 തീയതികളില് ശബരിമല ഡ്യൂട്ടിയിലുള്ള വിവിധ സേനാവിഭാഗങ്ങള് ഉള്പ്പെടെയുള്ള ജീവനക്കാര്ക്ക് വോട്ട് രേഖപ്പെടുത്താന് കഴിയാത്ത സാഹചര്യമാണ് നിലനില്ക്കുന്നത്.
സര്ക്കാര് ഉത്തരവ് പ്രകാരം ശബരിമല ഡ്യൂട്ടിക്ക് നിയോഗിച്ചിട്ടുള്ളവര്ക്ക് വോട്ട് ചെയ്യാനുള്ള അവസരം നിഷേധിക്കുന്നത് പൗരാവകാശ ലംഘനമാണ്.
വോട്ടെടുപ്പ് ദിവസങ്ങളില് ശബരിമല ഡ്യൂട്ടിയിലുള്ള എല്ലാ ജീവനക്കാര്ക്കും പോസ്റ്റല് ബാലറ്റ് അനുവദിക്കുകയും സന്നിധാനം, പമ്പ, നിലയ്ക്കല് എന്നീ ഡ്യൂട്ടി കേന്ദ്രങ്ങളില് വോട്ട് ഫെസിലിറ്റേഷന് സെന്റര് ക്രമീകരിക്കുകയും ചെയ്ത് സമ്മതിദാനാവകാശം വിനിയോഗിക്കുന്നതിനുള്ള അവസരം നല്കണമെന്ന് ആവശ്യപ്പെട്ട് സംസ്ഥാന തെരഞ്ഞെടുപ്പ് കമ്മീഷന് നിവേദനം നല്കിയതായി കേരള എന്ജിഒ സംഘ് സംസ്ഥാന പ്രസിഡന്റ് ജെ. മഹാദേവന്, ജനറല് സെക്രട്ടറി എസ്. രാജേഷ് എന്നിവര് പ്രസ്താവനയില് അറിയിച്ചു.
