ന്യൂദല്ഹി : അരുണാചല് പ്രദേശ് സ്വദേശിനിയും ബ്രിട്ടനില് താമസക്കാരിയുമായ വനിതയുടെ ഇന്ത്യന് പാസ്പോര്ട്ട് അംഗീകരിക്കില്ലെന്ന് പറഞ്ഞ് ഷാങ്ഹായ് വിമാനത്താവളത്തില് 18 മണിക്കൂര് തടഞ്ഞുവച്ചതില് ഇന്ത്യ ശക്തമായ പ്രതിഷേധം ചൈനയെ അറിയിച്ചു.ഇരു രാജ്യങ്ങളും തമ്മിലുളള ബന്ധം മെച്ചപ്പെടുത്താന് ശ്രമിക്കവെ ഇത്തരം രീതികള് അതിന് വിഘാതമുണ്ടാക്കുമെന്ന് ഇന്ത്യ അറിയിച്ചു.
പ്രേമ തോങ്ഡോക്ക് എന്ന് 30 കാരിക്കാണ് ദുരനുഭവമുണ്ടായത്.അരുണാചല് പ്രദേശിലെ വെസ്റ്റ് കാമെങ് ജില്ലയിലെ രൂപയില് നിന്നുള്ളയാളാണ് 14 വര്ഷമായി യുകെയില് താമസിക്കുന്ന പ്രേമ തോങ്ഡോക്ക്.യുവതിയുടെ കുടുംബം ഇപ്പോഴും ഇവിടെ താമസിക്കുന്നുണ്ട്.
സാമ്പത്തിക ഉപദേഷ്ടാവായി ജോലി ചെയ്യുന്ന പ്രേമ തോങ്ഡോക്ക് നവംബര് 21 ന് ലണ്ടനില് നിന്ന് ജപ്പാനിലേക്ക് യാത്ര ചെയ്യുന്നതിനാണ് ഷാങ്ഹായ് പുഡോംഗ് വിമാനത്താവളത്തില് ഇറങ്ങിയത്.
ഒക്ടോബര് 16 ന്, ഇതേ വിമാനത്താവളത്തില് ഇറങ്ങിയിരുന്നെങ്കിലും ഒരു പ്രശ്നവുമുണ്ടായിരുന്നില്ല.സുരക്ഷാ ഗേറ്റിലെ ക്യൂവില് കാത്തുനില്ക്കുമ്പോള് ഒരു സ്ത്രീ വന്ന് വിളിച്ചു കൊണ്ടു പോയി പാസ്പോര്ട്ട് സാധുതയില്ലാത്തതാണെന്ന് പറയുകയായിരുന്നു. പാസപോര്ട്ടില് അരുണാചല് പ്രദേശ് എന്റെ ജന്മസ്ഥലമായി രേഖപ്പെടുത്തിയിരിക്കുന്നുവെന്നും അത് ചൈനയുടെ ഭാഗമാണെന്നും അവര് പറഞ്ഞു. ഞാന് ചൈനക്കാരിയായതിനാല് ചൈനീസ് പാസ്പോര്ട്ട് എടുക്കണമെന്ന് പോലും പറഞ്ഞു. അവര് എന്നെ പരിഹസിക്കുകയായിരുന്നു-പ്രേമ തോങ്ഡോക്ക് പറഞ്ഞു.
ലണ്ടനില് നിന്ന് 12 മണിക്കൂര് യാത്ര ചെയ്ത തന്നെ 18 മണിക്കൂര് വിമാനത്താവളത്തില് തടഞ്ഞുവച്ചു. ഭക്ഷണം പോലും ലഭിച്ചില്ല. ജപ്പാനിലേക്കുള്ള വിസ ഉണ്ടായിരുന്നിട്ടും അവര് എന്നെ ജപ്പാനിലേക്ക് പോകാന് അനുവദിച്ചില്ല. യുകെയിലേക്ക് തിരികെ പോകുകയോ ഇന്ത്യയിലേക്ക് പറക്കുകയോ ചെയ്യണമെന്ന് അവര് നിര്ബന്ധിച്ചുവെന്നും പ്രേമ തോങ്ഡോക്ക് പറഞ്ഞു.
തുടര്ന്ന് ഇന്ത്യന് കോണ്സുലേറ്റിനെ ബന്ധപ്പെട്ടപ്പോള് ഉടന് തന്നെ ഉദ്യോഗസ്ഥരെത്തി ഭക്ഷണം നല്കി.ഇന്ത്യന് ഉദ്യോഗസ്ഥര് ആവശ്യപ്പെട്ടിട്ടും ചൈനീസ് അധികൃതര് തന്നെ ജപ്പാനിലേക്ക് പോകാന് അനുവദിക്കാത്തതിനെ തുടര്ന്ന് ഇന്ത്യയിലേക്ക് വിമാന ടിക്കറ്റ് ബുക്ക് ചെയ്തു. തായ്ലന്ഡില് ഇറങ്ങി വേണം ഇന്ത്യയിലെത്താനെന്നതിനാല് അവിടെ നിന്നാണ് ഇന്ത്യന് വിദേശകാര്യ മന്ത്രാലയത്തിന് ഇ മെയില് വഴി പരാതി നല്കിയതെന്ന് പ്രേമ തോങ്ഡോക്ക് പറഞ്ഞു.
