ന്യൂദല്ഹി: ചൈനയിലും തുര്ക്കിയിലും നിaര്മിച്ച ആയുധങ്ങള് ഭാരതത്തിലേക്ക് എത്തിച്ചിരുന്ന അന്താരാഷ്ട്ര ആയുധസംഘത്തെ ദല്ഹി പോലീസ് അറസ്റ്റ് ചെയ്തു. സംഘത്തിലെ നാല് പ്രധാനികളെയാണ് അറസ്റ്റ് ചെയ്തത്. പത്ത് വിദേശ നിര്മിത പിസ്റ്റളുകളും 92 വെടിയുണ്ടകളും ഇവരില് നിന്ന് കണ്ടെത്തി.
പാക് രഹസ്യാന്വേഷണ ഏജന്സിയായ ഐഎസ്ഐ ബന്ധമുള്ള ഈ സംഘം, ചൈനയിലും തുര്ക്കിയിലും നിര്മിച്ച പിസ്റ്റളുകള് പാകിസ്ഥാന് വഴി ഭാരതത്തിലെത്തിക്കുകയായിരുന്നു. ഇവരില് നിന്ന് ആയുധങ്ങള് വാങ്ങിയവരെക്കുറിച്ച് അന്വേഷണം ആരംഭിച്ചു. അത്യാധുനിക ആയുധങ്ങള് വിതരണം ചെയ്യുന്നുവെന്ന രഹസ്യ വിവരത്തിന്റെ അടിസ്ഥാനത്തില് നടത്തിയ അന്വേഷണത്തിലാണ് പ്രതികളെ കുറിച്ചുള്ള വിവരങ്ങള് ലഭിച്ചത്.
ആയുധങ്ങള് എത്തിക്കുന്നതിന് ഇവര് ദല്ഹിയിലെ രോഹിണിയില് എത്തിയിരുന്നു. അന്വേഷണത്തിനിടെ ഒരു സ്വിഫ്റ്റ് കാര് ഉദ്യോഗസ്ഥര് തടഞ്ഞു. രണ്ട് പേരാണ് വാഹനത്തില് ഉണ്ടായിരുന്നത്. പരിശോധനയില് സ്പീക്കര് ബോക്സില് ഒളിപ്പിച്ച നിലയില് ബാഗ് കണ്ടെത്തി.
ഇതില് നിന്ന് ആയുധങ്ങള് കണ്ടെത്തുകയായിരുന്നു. ഇവരെ ചോദ്യം ചെയ്തതില് നിന്ന് മറ്റ് രണ്ട് പേര്ക്ക് കൂടി പങ്കുണ്ടെന്ന വിവരം പുറത്ത് വരുന്നത്. പ്രതികളെ ഒരുമിച്ചിരുത്തി ചോദ്യം ചെയ്തതില് നിന്ന് പാക് അതിര്ത്തിയില് ആയുധങ്ങള്, വെടിക്കോപ്പുകള് എന്നിവ കൈമാറാന് ഡോണുകള് ഉപയോഗിക്കുന്നുണ്ടെന്നും വിവരം ലഭിച്ചു.
