പാലക്കാട് : അട്ടപ്പാടിയില് സ്വതന്ത്രനായി മത്സരിക്കുന്ന സിപിഎം മുന് ഏരിയ സെക്രട്ടറി വി ആര് രാമകൃഷ്ണന് നേരെ വധ ഭീഷണി മുഴക്കി ലോക്കല് കമ്മിറ്റി സെക്രട്ടറി ജംഷീര്.പത്രിക പിന്വലിച്ചില്ലെങ്കില് കൊല്ലുമെന്നാണ് ഭീഷണി. വി ആര് രാമകൃഷ്ണനും, ലോക്കല് കമ്മിറ്റി സെക്രട്ടറി ജംഷീറും തമ്മിലുള്ള ഫോണ് സംഭാഷണം പുറത്തായി.
ഏറെ കാലം പാര്ട്ടി പ്രവര്ത്തകനും ഏരിയ സെക്രട്ടറിയും ആയിരുന്നു രാമകൃഷ്ണന്.പാര്ട്ടിയില് അഴിമതിയാണ് നടക്കുന്നതെന്നുളള ആരോപണവുമായാണ് രാമകൃഷ്ണന് സ്വതന്ത്രനായി മത്സരിക്കാന് തയാറായത്. തുടര്ന്നാണ് ലോക്കല് സെക്രട്ടറി ജംഷീറിന്റെ ഭീഷണി. ആര് വന്ന് പറഞ്ഞാലും സ്ഥാനാര്ഥിത്വത്തില് നിന്ന് പിന്മാറില്ലെന്ന് വി ആര് രാമകൃഷ്ണന് ഫോണ് സംഭാഷണത്തില് പറയുന്നു. എന്നാല് ഞങ്ങള്ക്ക് നിങ്ങളെ കൊല്ലേണ്ടി വരുമെന്ന് ജംഷീര് ഭീഷണിപ്പെടുത്തുകയായിരുന്നു. ഇപ്പോള് സ്നേഹത്തോടെയാണ് സംസാരിക്കുന്നതെന്നും ഇനി അത് പറ്റില്ലെന്നും ജംഷീര് പറഞ്ഞു.നിങ്ങള് എന്താണ് ചെയ്യാന് ഉദേശിക്കുന്നതെന്ന് രാമകൃഷ്ണന് ചോദിക്കുമ്പോള് തട്ടിക്കളയുമെന്ന് ജംഷീര് മറുപടി നല്കുന്നതും ഫോണ് സംഭാഷണത്തില് ഉണ്ട്.
അട്ടപ്പാടി തിരിച്ചുപിടിക്കാന് കഴിയുമെന്ന ആത്മവിശ്വാസത്തിലായിരുന്ന സിപിഎം, വിആര് രാമകൃഷ്ണന് സ്വതന്ത്ര സ്ഥാനാര്ഥിയായി മത്സര രംഗത്തേക്ക് വന്നതോടെ അങ്കലാപ്പിലായി. ഇതാണ് പ്രകോപനത്തിന് കാരണം.
രാമകൃഷ്ണന്റെ സ്ഥാനാര്ഥിത്വം പാര്ട്ടിക്ക് ക്ഷീണമുണ്ടാക്കുമെന്ന വിലയിരുത്തലില് അനുനയ ശ്രമങ്ങള് നടന്നുവരികയായിരുന്നു.എന്നാല് വഴങ്ങാതെ വന്നതോടെയാണ് വധ ഭീഷണി ഉണ്ടായത്. സംഭവത്തില് പൊലീസില് പരാതി നല്കുമെന്ന് രാമകൃഷ്ണന് പറഞ്ഞു. ഉറച്ച നിലപാടുമായി മുന്നോട്ടു പോകുമെന്നും ഭീഷണിയെ വകവെക്കുന്നില്ലെന്നും അദേഹം അറിയിച്ചു.
