പനാജി: ഗോവ അന്താരാഷ്ട ചലച്ചിത്രോത്സവത്തില് നോണ് ഫീച്ചര് വിഭാഗത്തില് ശ്രദ്ധേയമായി ഇ.വി. ഗണേഷ് ബാബു സംവിധാനം ചെയ്ത ആനിറായ്. ഒരു സാധാരണ മനുഷ്യനും പശുവും തമ്മിലുള്ള ആത്മബന്ധമാണ് പശുക്കൂട്ടം എന്ന് അര്ഥം വരുന്ന ഈ ചിത്രത്തിന്റെ ഇതിവൃത്തം. ജീവിതത്തിന്റെ ഭാഗം ആയിരുന്ന പശുവിനെ കറവ വറ്റിയിട്ടും ഉപേക്ഷിക്കാന് തയ്യാറാവാത്ത വീരച്ചാമി, തന്റെ അവസാന ശ്വാസം വരെ സംരക്ഷിക്കണം എന്ന് ആഗ്രഹിക്കുന്നു. എന്നാല് പശുവിനെ അദ്ദേഹത്തിന്റെ അറിവോടെയല്ലാതെ മറ്റൊരാള്ക്ക് വില്ക്കുകയും അന്വേഷണത്തിനൊടുവില് തന്റെ പശുവിന്റെ തോല് കൊണ്ട് ചെണ്ട നിര്മിച്ചതായും മനസിലാക്കുന്നു. ജീവന്റെ ഭാഗമായിരുന്ന പശു സംഗീതം ആയി മാറി എന്ന് ആശ്വാസം കണ്ടെത്തുന്ന വീരച്ചാമിയുടെ കഥയാണ് ആനിറായി. ഇന്ത്യന് പനോരമ നോണ് ഫീച്ചര് വിഭാഗത്തിലെ മത്സര ചിത്രമാണ്. മുംബൈ ജാഗരണ് ഫിലിം ഫെസ്റ്റിവലിലും പ്രദര്ശിപ്പിച്ചിരുന്നു. അര്ജുനന് മാരിയപ്പന് ആണ് പ്രധാന കഥാപാത്രത്തെ അവതരിപ്പിച്ചത്. കഥ, തിരക്കഥ, സംഭാഷണം നിര്വഹിച്ചിരിക്കുന്നത് ഇ.വി. ഗണേഷ് ബാബു. ഇദ്ദേഹം സംവിധാനം ചെയ്ത കരുവാരൈ എന്ന ഹൃസ്വ ചിത്രം 2021 ല് സംഗീത വിഭാഗത്തില് ദേശീയ പുരസ്കാരം നേടിയിരുന്നു.
പാപ്പ ബുക്ക പ്രദര്ശിപ്പിച്ചു
ഏഷ്യ പ്രീമിയര് വിഭാഗത്തില് ഡോ. ബിജു ദാമോദരന് സംവിധാനം ചെയ്ത-ഭാരതം-പാപുവ ന്യൂഗിനി സംയുക്ത നിര്മാണ സംരംഭമായ പാപ്പ ബുക്ക പ്രദര്ശിപ്പിച്ചു. 2026 ലെ മികച്ച രാജ്യാന്തര സിനിമയ്ക്കായുള്ള ഓസ്കര് പുരസ്കാരത്തിന് പാപുവ ന്യൂഗിനിയുടെ ഔദ്യോഗിക എന്ട്രിയാണ് ഈ ചിത്രം. താരങ്ങളായ പ്രകാശ് ബാരെ, സൈന് ബൊബോറോ, റിതാഭരി ചക്രബര്ത്തി, ജോണ് സൈക് എന്നിവരും നിര്മാതാക്കളും പങ്കെടുത്തു.
