രാജ്യത്തെ സമസ്ത മേഖലകളേയും പുരോഗതിയിലേക്കും ക്ഷേമത്തിലേക്കും ഉയര്ത്തി പ്രധാനമന്ത്രി നരേന്ദ്ര മോദി രാഷ്ട്രത്തെ നയിക്കുന്നത് വികസിത ഭാരതത്തിലേക്കാണ്. മോദി ഭരണത്തിന്റെ പതിനൊന്ന് വര്ഷത്തിനിടെ രാജ്യത്തെ 25 കോടിയിലധികം ജനങ്ങള് ദാരിദ്ര്യത്തില് നിന്ന് മുക്തരായെന്ന് കണക്കുകള് വ്യക്തമാക്കുന്നു. വികസനവും ക്ഷേമപദ്ധതികളും സമൂഹത്തിലെ ഏറ്റവും പാവപ്പെട്ടവനിലേക്ക് എത്തണമെന്ന സബ്കാ സാത്ത്, സബ്കാ വികാസ് എന്ന തത്വത്തില് എപ്പോഴും കേന്ദ്ര സര്ക്കാര് ഉറച്ചുനിന്നു.
പ്രധാനമന്ത്രി ആവാസ് യോജനയിലൂടെ നാല് കോടി കുടുംബങ്ങളുടെ വീടെന്ന സ്വപ്നം യാഥാര്ത്ഥ്യമാക്കി. ഉജ്ജ്വല യോജനയിലൂടെ 10.33 കോടി വീടുകളില് സൗജന്യ ഗ്യാസ് കണക്ഷന് എത്തിച്ചു. സൗഭാഗ്യ യോജനയിലൂടെ 2.5 കോടി കുടുംബങ്ങള്ക്ക് വൈദ്യുതി എത്തിച്ചു. സ്വച്ഛ് ഭാരത് മിഷന്റെ ഭാഗമായി 12 കോടി ശൗചാലയങ്ങള് നിര്മിച്ചു. ജല് ജീവന് മിഷനിലൂടെ 15.62 കോടി വീടുകളില് പൈപ്പ് വെള്ളം എത്തിച്ചു. 50 കോടി പാവപ്പെട്ടവര്ക്ക് ആയുഷ്മാന് ഭാരതിലൂടെ അഞ്ചു ലക്ഷം രൂപവരെ സൗജന്യ ആരോഗ്യ സംരക്ഷണം ഉറപ്പാക്കി. പ്രധാനമന്ത്രി ഗരീബ് കല്യാണ് അന്ന യോജനയിലൂടെ 81 കോടിയിലധികം ഗുണഭോക്താക്കള്ക്ക് ഭക്ഷ്യസുരക്ഷയും മതിയായ പോഷകാഹാരവും ഉറപ്പാക്കി. പദ്ധതി പ്രകാരം ഓരോ വ്യക്തിക്കും ഓരോ മാസവും കേന്ദ്രം അഞ്ചു കിലോ എന്ന നിലയില് സൗജന്യമായി ഭക്ഷ്യധാന്യങ്ങള് നല്കുന്നു. രണ്ട് ലക്ഷം കോടി രൂപയിലധികം വാര്ഷിക ബജറ്റുള്ള പദ്ധതി 2028 ഡിസംബര് വരെ നീട്ടി.
സാധാരണക്കാര്ക്ക് താങ്ങാവുന്ന വിലയില് മരുന്നുകള് വിതരണം ചെയ്യുന്നതിനായി 16,000ത്തിലധികം ജന് ഔഷധി കേന്ദ്രങ്ങള് തുറന്നു. ഇതിലൂടെ 38,000 കോടി രൂപ ലാഭിച്ചു. പിഎം സ്വനിധി പദ്ധതിയിലൂടെ 68 ലക്ഷം വഴിയോര കച്ചവടക്കാര്ക്ക് വായ്പ ലഭ്യമാക്കി. സ്റ്റാന്ഡ് അപ്പ് ഇന്ത്യ പദ്ധതിപ്രകാരം പട്ടികജാതി – പട്ടികവര്ഗവിഭാഗങ്ങള്ക്ക് 14,700 കോടിയിലധികം വായ്പകള് നല്കി. ഗോത്രവര്ഗക്ഷേമത്തിനും അടിസ്ഥാനസൗകര്യങ്ങള് ഏര്പ്പെടുത്തുന്നതിനുമായുള്ള നിരവധി പദ്ധതികളും നടപ്പാക്കുന്നു.
യുവാക്കളുടെ ശാക്തീകരണം
ദേശീയ വിദ്യാഭ്യാസ നയം മുതല് സ്റ്റാര്ട്ടപ്പ് ഇന്ത്യ വരെയുള്ള പദ്ധതികള് യുവജനങ്ങളുടെ മുന്നേറ്റം ലക്ഷ്യമിട്ടായിരുന്നു. സ്റ്റാര്ട്ടപ്പ് ഇന്ത്യയ്ക്കു കീഴില് മാത്രം 1.6 ലക്ഷത്തിലധികം അംഗീകൃത സ്റ്റാര്ട്ടപ്പുകളിലൂടെ 17.6 ലക്ഷത്തിലധികം തൊഴില് അവസരം സൃഷ്ടിക്കപ്പെട്ടു. യൂണികോണുകളുടെ എണ്ണത്തില് ഭാരതം മൂന്നാമതെത്തി.
വിവിധ കേന്ദ്രസര്ക്കാര് ജോലികളിലേക്കുള്ള പരീക്ഷകള് മാതൃഭാഷയില് എഴുതാനുള്ള തീരുമാനം നടപ്പാക്കി. പത്ത് ലക്ഷം പേരെ കേന്ദ്രസര്ക്കാര് ജോലികളിലേക്ക് നിയമിക്കുന്നതിനുള്ള റോസ്ഗാര് യോജന ലക്ഷ്യത്തിലേക്ക് നീങ്ങുന്നു. പുതിയ മെഡിക്കല് കോളജുകള്, ഐഐടികള്, സര്വകലാശാലകള് മുതലായവ സ്ഥാപിച്ച് ഉന്നത വിദ്യാഭ്യാസ മേഖലയ്ക്ക് വലിയ ഉത്തേജനം നല്കി. 490 പുതിയ സര്വകലാശാലകളും ഏഴ് പുതിയ ഐഐടികളും സ്ഥാപിച്ചു. അഗ്നിവീര്, 1.6 കോടി യുവാക്കള്ക്ക് പരിശീലനം നല്കിയ പ്രധാനമന്ത്രി കൗശല് വികാസ് യോജന, പൊതുപരീക്ഷകളിലെ ചോദ്യപേപ്പര് ചോര്ച്ച തടയുന്നതിനും നിയമനത്തില് സുതാര്യത കൊണ്ടുവരുന്നതിനുമായി നടപ്പാക്കിയ പബ്ലിക് എക്സാമിനേഷന്സ് (പ്രിവന്ഷന് ഓഫ് അണ്ഫെയര് മീന്സ്) 2024 ആക്റ്റ് എന്നിവ യുവാക്കള്ക്ക് കരുത്തു പകര്ന്ന ശ്രദ്ധേയമായ ചില മുന്നേറ്റങ്ങളാണ്.
