കമ്യൂണിസ്റ്റുകാരനായ അച്ഛന്റെ കമ്യൂണിസ്റ്റുകാരനായ മകന്. സ്കൂള്, കോളജ് പഠനകാലത്ത് എസ്എഫ്ഐയുടെ തീപ്പൊരി നേതാവ്. സിപിഎം നേതാവായിരുന്ന കെ. അനിരുദ്ധന്റെ ഇളയമകന്. ഇങ്ങനെ വിശേഷണങ്ങള് ഏറെയുള്ള കസ്തൂരി അനിരുദ്ധനാണ് തിരുവനന്തപുരം കോര്പ്പറേഷന് തൈക്കാട് വാര്ഡിലെ ബിജെപി സ്ഥാനാര്ത്ഥി. എന്ജിനീയറിങ് കോളജിലെ എസ്എഫ്ഐ യൂണിറ്റ് സെക്രട്ടറിയും കോളജ് യൂണിയന് ചെയര്മാനുമായിരുന്ന കറതീര്ന്ന സജീവ കമ്യൂണിസ്റ്റുകാരനായിരുന്നു കസ്തൂരി.
സ്കൂള് കാലഘട്ടം മുതല് വിദ്യാര്ത്ഥി രാഷ്ട്രീയത്തില് സജീവമായിരുന്നു. എന്ജിനീയറിങ് കോളജില് ആന്റി റാഗിങ് സമരത്തിലൂടെയാണ് എസ്എഫ്ഐയുടെ നേതൃനിരയിലെത്തിയത്. എന്ജിനീയറിങ് പഠനത്തിനു ശേഷം ഫരീദബാദിലും നോയിഡയിലും ജോലി ചെയ്തു. പിന്നീട് ബോംബെ ഐഐടിയില് നിന്ന് ഇന്റസ്ട്രിയല് ഡിസൈന് കോഴ്സ് ഒന്നാം റാങ്കോടെ പാസായി. ഔറംഗാബാദിലെ വിപ്രോയില് ജോലിക്കു ചേരുമ്പോള് മനസില് നിന്ന് രാഷ്ട്രീയമൊക്കെ മാഞ്ഞുതുടങ്ങിയിരുന്നു.
ഭാര്യ ലളിതയുടെ കുടുംബ പശ്ചാത്തലമാണ് കസ്തൂരിയെ ആത്മീയ വഴിയിലേക്ക് നയിച്ചത്. സ്കൂള് ഓഫ് ആര്ട്സിലെ സൂപ്രണ്ടായിരുന്ന ഭാര്യാപിതാവ് കെ.നാരായണ അയ്യര് ആധ്യാത്മക, തത്വചിന്താ മേഖലകളിലായി എഴുതിയ പന്ത്രണ്ടോളം പുസ്തകങ്ങള് വായിച്ച് ഈശ്വര വിശ്വാസം, വിഗ്രഹാരാധന എന്തിനാണ്, ബ്രഹ്മം എന്നുള്ള ശക്തി തുടങ്ങിയവയെക്കുറിച്ച് മനസിലാക്കി.
അച്ഛന്റെ അസുഖവും മരണവും ഭക്തനാക്കി
അമ്മയ്ക്ക് ഹൃദയസംബന്ധമായ അസുഖം ബാധിച്ചതിനെത്തുടര്ന്ന് 2000ല് തിരുവനന്തപുരത്ത് തിരിച്ചെത്തി. ഇന്റസ്ട്രിയല് ഡിസൈന് കണ്സള്ട്ടന്സി (ഡിസൈ ടെക്) എന്ന ചെറുകിട വ്യവസായം ആരംഭിച്ചു. രാജ്യത്തെ ആദ്യ ഓട്ടോമാറ്റിക് ചെക്ക്ന് പേയ്മെന്റ് മെഷീന് ഡിസൈന് ചെയ്തത് ഈ സ്ഥാപനമാണ്. ആ സമയത്താണ് അച്ഛന് അനിരുദ്ധനെ പക്ഷാഘാതത്തെ തുടര്ന്ന് ആശുപത്രിയില് പ്രവേശിപ്പിച്ചത്. ഏതാനും മണിക്കൂറുകള് മാത്രമേ ആയുസുള്ളൂ എന്ന് ഡോക്ടര്മാര് വിധിയെഴുതിയ അച്ഛന് വീണ്ടും എട്ട് വര്ഷം ജീവിച്ചത് ഈശ്വരകൃപ കൊണ്ടാണെന്ന് കസ്തൂരി പറയുന്നു. അതോടെ ശ്രീപദ്മനാഭന്റെ ഭക്തനായി, ശ്രീപദ്മനാഭസ്വാമി ക്ഷേത്രത്തിലെ നിത്യസന്ദര്ശകനായി. ക്ഷേത്രത്തില് അഞ്ഞൂറ് ദിവസം തുടര്ച്ചയായി നാമജപ പരിക്രമത്തില് പൂര്ണമായും പങ്കെടുത്തത് വലിയൊരു വഴിത്തിരിവായി. വീട്ടില് സത്സംഗം ആരംഭിച്ചു. 18 വര്ഷം തുടര്ച്ചയായി എല്ലാ ഞായറാഴ്ചയും രണ്ട് മണിക്കൂര് സത്സംഗം നടന്നു.
അണ്ണാഹസാരെയുടെ സമരവും മോദിയുടെ ഭരണവും സ്വാധീനിച്ചു
അഴിമതിക്കും കള്ളപ്പണ നിക്ഷേപത്തിനുമെതിരെ ഗാന്ധിയന് അണ്ണാഹസാരെ ദല്ഹി രാംലീല മൈതാനത്ത് നടത്തിയ നിരാഹാര സമരത്തോട് ഐക്യദാര്ഢ്യം പ്രകടിപ്പിച്ച് തിരുവനന്തപുരത്ത് നടത്തിയ നാമജപഘോഷയാത്രയില് പങ്കെടുത്തതോടെയാണ് ഹിന്ദു സംഘടനകളുമായി അടുത്തത്. കേന്ദ്രത്തില് നരേന്ദ്ര മോദി അധികാരത്തില്വന്നതും കേന്ദ്രസര്ക്കാരിന്റെ പ്രവര്ത്തനങ്ങളും സ്വാധീനിച്ചു. സമൂഹത്തിന്റെ അടിത്തട്ടിലുള്ളവന് കൈത്താങ്ങാകണം എന്ന കമ്യൂണിസ്റ്റ് പ്രത്യയശാസ്ത്രം അവര് കൈവിട്ടെങ്കിലും നരേന്ദ്ര മോദി സര്ക്കാര് അത് പ്രാവര്ത്തികമാക്കിയത് ദേശീയ പ്രസ്ഥാനങ്ങളോടുള്ള അടുപ്പം കൂട്ടി. തുടര്ന്ന് ഹിന്ദു ഐക്യവേദിയുമായി സഹകരിച്ച് പ്രവര്ത്തിച്ചു തുടങ്ങി.
കേന്ദ്രസര്ക്കാരിന്റെ സഹായത്തോടെ തലസ്ഥാനത്ത് വികസനം കൊണ്ടുവരും
കഴിഞ്ഞ വര്ഷം ഏപ്രില് 5 മുതല് ഹിന്ദു ഐക്യവേദി തിരുവനന്തപുരം ജില്ലാ പ്രസിഡന്റായി പ്രവര്ത്തിച്ചുവരുന്നു. കഴിഞ്ഞ ദിവസം എറണാകുളത്ത് ടെമ്പിള് പാര്ലമെന്റില് പങ്കെടുത്തുകൊണ്ടിരിക്കുമ്പോഴാണ് കോര്പ്പറേഷന് തെരഞ്ഞെടുപ്പില് മത്സരിക്കണമെന്ന ആവശ്യവുമായി ബിജെപി ജില്ലാ പ്രസിഡന്റ് കരമന ജയന്റെ ഫോണ് വരുന്നത്. നഗര വികസനത്തിന് നിരവധി ആശയങ്ങളുള്ള കസ്തൂരിക്ക് അവ പ്രാവര്ത്തികമാക്കാന് ലഭിച്ച അവസരമായിട്ടാണ് സ്ഥാനാര്ത്ഥിത്വത്തെ കാണുന്നത്. കേന്ദ്രസര്ക്കാരിന്റെ സഹായത്തോടെ ഒട്ടേറെ വികസന പ്രവര്ത്തനങ്ങള് തലസ്ഥാന നഗരസഭയ്ക്ക് ചെയ്യാന് കഴിയുമെന്നും അദ്ദേഹത്തിന് ഉറപ്പുണ്ട്.
ജന്മഭൂമി ഓണ്ലൈന്