ന്യൂദല്ഹി: ദല്ഹി സ്ഫോടനം സംബന്ധിച്ച അന്വേഷണങ്ങള്ക്കിടെ ഫരീദാബാദ് അല് ഫലാഹ് സര്വകലാശാലാ വിദ്യാര്ത്ഥികള്ക്കും ഭീകര പ്രവര്ത്തനങ്ങളുമായി ബന്ധമുണ്ടെന്നു കണ്ടെത്തി. 2007ല് അല് ഫലാഹില് നിന്ന് ബി ടെക് പൂര്ത്തിയാക്കിയ മിര്സ ഷഹാബ് ബെയ്ഗിന്റെ ഭീകര ബന്ധമാണിപ്പോള് പുറത്തുവന്നിരിക്കുന്നത്. 2008ല് ദല്ഹി, അഹമ്മദാബാദ് എന്നിവിടങ്ങളിലായി നടന്ന സ്ഫോടനങ്ങളില് ബെയ്ഗിന് പങ്കുണ്ട്. ദല്ഹി സ്ഫോടനക്കേസില് അല് ഫലാഹ് സര്വകലാശാലാ ജീവനക്കാരില് ചിലര് മുഖ്യപ്രതികളാണ്. കൂടാതെ സര്വകലാശാലയിലെ നിരവധി ജീവനക്കാരും വിദ്യാര്ത്ഥികളും സംശയ നിഴലിലുമാണ്. അതിനിടെയാണ് പൂര്വ വിദ്യാര്ത്ഥിയുടെ ഭീകര ബന്ധം പുറത്തുവന്നത്.
ഉത്തര്പ്രദേശ് അസംഗഢ് സ്വദേശിയായ ബെയ്ഗ് ഇന്ത്യന് മുജാഹിദ്ദീന് ഭീകരനാണ്. ഇയാള്ക്കെതിരേ ദല്ഹി പോലീസിന്റെ ലുക്ക്ഔട്ട് നോട്ടീസുണ്ട്. 2008ലെ സ്ഫോടനങ്ങള്ക്ക് പിന്നാലെ പാകിസ്ഥാനിലേക്ക് കടന്ന ബെയ്ഗ് പിന്നീട് ഐഎസില് ചേര്ന്നതായാണ് റിപ്പോര്ട്ട്. ഭാരതം തിരയുന്ന ഏറ്റവും വലിയ ഭീകരരില് ഒരാളായ ഇയാള്ക്കെതിരേ ഇന്റര്പോള് റെഡ് കോര്ണര് നോട്ടീസും പുറപ്പെടുവിച്ചിട്ടുണ്ട്.
സ്കൂളില് പഠിക്കേ ഒന്പതാം ക്ലാസില് പരാജയപ്പെട്ട ബെയ്ഗ് 2007ല് അല് ഫലാഹ് യൂണിവേഴ്സിറ്റിയില് നിന്ന് ഇലക്ട്രോണിക്സ് ഇന്സ്ട്രുമെന്റേഷനില് ബി ടെക് ബിരുദം നേടി. ഇതിനു പിന്നില് ഏതെങ്കിലും വിധത്തിലുള്ള തട്ടിപ്പ് നടന്നിട്ടുണ്ടോയെന്നും പരിശോധിക്കുന്നു. അല് ഫലാഹ് കേന്ദ്രീകരിച്ച് വൈറ്റ് കോളര് ഭീകരതയുടെ മൊഡ്യൂള് പ്രവര്ത്തിക്കുന്നുണ്ടെന്നാണ് അന്വേഷണ സംഘത്തിന്റെ വിലയിരുത്തല്.
അല് ഫലാഹ് സര്വകലാശാലയുമായി ബന്ധമുള്ള ദല്ഹി, ഫരീദാബാദ് എന്നിവിടങ്ങളിലെ വിവിധ സ്ഥാപനങ്ങളില് എന്ഐഎ, എടിഎസ്, ഹരിയാന-ജമ്മുകശ്മീര് പോ
ലീസ്, വിവിധ കേന്ദ്ര ഏജന്സികള് എന്നിവര് തിരച്ചില് നടത്തിവരികയാണ്. ഭീകര ബന്ധം പുറത്തുവന്നതിനെത്തുടര്ന്ന് അസോസിയേഷന് ഓഫ് ഇന്ത്യന് യൂണിവേഴ്സിറ്റീസില് നിന്ന് (എഐയു) അല് ഫലാഹിന്റെ അംഗത്വം റദ്ദാക്കി. വഞ്ചനക്കുറ്റം, വ്യാജരേഖ ചമയ്ക്കല് എന്നിവയ്ക്ക് ദല്ഹി പോലീസും അല് ഫലാഹിനെതിരേ എഫ്ഐആറും രജിസ്റ്റര് ചെയ്തിട്ടുണ്ട്.
