കൊല്ലം : ശബരിമല സ്വര്ണക്കൊള്ള കേസില് അറസ്റ്റിലായ ദേവസ്വം ബോര്ഡ് മുന് പ്രസിഡന്റും സി പി എം നേതാവുമായ എ പത്മകുമാര് റിമാന്ഡില്.പതിനാല് ദിവസത്തേക്കാണ് റിമാന്ഡ് ചെയ്തത്. പത്മകുമാറിനെ തിരുവനന്തപുരം സ്പെഷ്യല് സബ് ജയിലിലേക്ക് മാറ്റി.
കൊല്ലം വിജിലന്സ് കോടതി ജഡ്ജി മുമ്പാകെയാണ് പത്മകുമാറിനെ ഹാജരാക്കിയത്. നാലുമണിക്കൂര് ചോദ്യം ചെയ്യലിന് ശേഷമാണ് പ്രത്യേക അന്വേഷണസംഘം പത്മകുമാറിനെ അറസ്റ്റ് ചെയ്തത്.
സ്വര്ണക്കൊള്ളയുടെ മുഖ്യ സൂത്രധാരന് എ.പത്മകുമാറെന്നാണ് അന്വേഷണസംഘത്തിന്റെ കണ്ടെത്തല്. ഉണ്ണികൃഷ്ണന് പോറ്റിയുമായി ഗൂഢാലോചന നടത്തിയെന്നും കണ്ടെത്തി.
കേസിലെ എട്ടാം പ്രതിയാണ് പത്മകുമാര്.സ്വര്ണപ്പാളികള് ചെമ്പെന്ന് രേഖപ്പെടുത്തിയത് പത്മകുമാറിന്റെ അറിവോടെയാണെന്നാണ് പ്രത്യേക അന്വേഷണ സംഘം കണ്ടെത്തിയത്. എന്നാല് ഉണ്ണികൃഷ്ണന് പോറ്റി ദേവസ്വം മന്ത്രിക്ക് നല്കിയ അപേക്ഷയാണ് ബോര്ഡിന് കൈമറിയതെന്നും ഉദ്യോഗസ്ഥ ശുപാര്ശ കൂടി കണക്കിലെടുത്താണ് സ്വര്ണം പൂശാന് അനുമതി നല്കിയതെന്നുമാണ് എ പത്മകുമാറിന്റെ മൊഴി.
ശബരിമല സ്വര്ണക്കൊള്ളയില് സി പി എം നേതാക്കളായ വാസുവും പത്മകുമാറും അറസ്റ്റിലായതോടെപാര്ട്ടി പ്രതിരോധത്തിലായി.തദ്ദേശ തെരഞ്ഞെടുപ്പ് പടിവാതിക്കല് എത്തിയിരിക്കെയാണ് അറസ്റ്റ്.
