തിരുവനന്തപുരം: രാജ്യത്ത് ആദ്യമായി വിഭാവനം ചെയ്ത കേരളത്തിലെ ഖരമാലിന്യ സംസ്കരണ പദ്ധതിയില് സര്ക്കാര് ലോക ബാങ്കിനെയും പറ്റിച്ചു. പദ്ധതി അവസാനിക്കാന് ഒന്നര വര്ഷം മാത്രം ശേഷിക്കേ ആകെ ചെലവാക്കിയത് ശമ്പളത്തിനായി 120കോടി മാത്രം. അന്ത്യശാസനം നല്കി ലോക ബാങ്ക്. സമയം നീട്ടി നല്കണമെന്ന ആവശ്യവുമായി സംസ്ഥാന സര്ക്കാര്.
2021 മാര്ച്ച് ഒന്പതിനാണ് 2200 കോടി വായ്പയ്ക്ക് അംഗീകാരം നല്കിയത്. 2027 ജൂണ് 30 വരെയാണ് കാലാവധി. സംസ്ഥാനത്തെ 87 മുനിസിപ്പാലിറ്റികളും ആറു കോര്പ്പറേഷനുകളും അത്യാധുനിക സാങ്കേതികവിദ്യ ഉപയോഗിച്ച് ശാസ്ത്രീയമായി ഖരമാലിന്യസംസ്കരണം നടപ്പാക്കാന് വിഭാവനം ചെയ്തതാണ് പദ്ധതി. രാജ്യത്ത് തന്നെ ഏറ്റവും ആദ്യം അനുവദിച്ച പദ്ധതിയാണിത്.
പദ്ധതി നടത്തിപ്പുമായി ബന്ധമില്ലാത്ത ഉദ്യോഗസ്ഥരെയാണ് സര്ക്കാര് ആദ്യം നിയമിച്ചത്. ശമ്പളത്തിനും മറ്റും പണം വിനിയോഗിച്ചതല്ലാതെ പദ്ധതിയുമായി മുന്നോട്ട് പോകാന് കഴിയാത്തതിനാല് ലോക ബാങ്ക് വീണ്ടും ഇടപെട്ടു. ഒരു മുഴുവന് സമയ ഡയറക്ടര് വേണമെന്ന ആവശ്യം ഉന്നയിച്ചു.
ഇതോടെ ദിവ്യ എസ്. അയ്യരെ ഡയറക്ടറാക്കി. സാങ്കേതിക പരിജ്ഞാനം ഇല്ലാത്തവരെ പദ്ധതി നിര്വഹണ ഉദ്യോഗസ്ഥരാക്കിയും ‘കേരള ഖരമാലിന്യ സംസ്കരണ പദ്ധതി’ എന്ന പേരില് പ്രത്യേക കമ്പനി രൂപീകരിച്ചു. ദിവ്യ എസ്. അയ്യര് മറ്റ് വിവിധ വകുപ്പുകളുടെ ചുമതല വഹിക്കുന്നുണ്ട്. അതിനാല് ഈ പദ്ധതിയില് വേണ്ടത്ര ശ്രദ്ധ ചെലുത്താന് സാധിക്കുന്നില്ല.
2200 കോടിയുടെ പദ്ധതിക്ക് ഒരു സ്ഥിരം ഡയറക്ടര് ഇല്ലാതെ വന്നതോടെ ലോക ബാങ്ക് പ്രതിനിധികളുമായുള്ള യോഗം പോലും ചേര്ന്നില്ല. നാലുവര്ഷമായിട്ടും പദ്ധതി ഒരിഞ്ച് മുന്നോട്ട് പോയില്ല. പക്ഷെ ഉദ്യോഗസ്ഥരുടെ ശമ്പളച്ചെലവിനും വാഹനങ്ങള്ക്കുമൊക്കെയായി 120 കോടി ചെലവാക്കി. ഇത് മനസിലാക്കിയ ലോക ബാങ്ക് അധികൃതര് 800 കോടി വെട്ടിക്കുറച്ചു. എന്നിട്ടും സര്ക്കാര് പദ്ധതി ചലിപ്പിക്കാന് നടപടി സ്വീകരിച്ചില്ല.
ഒക്ടോബറില് ലോക ബാങ്ക് പ്രതിനിധികള് അവലോകനത്തിന് എത്തിയപ്പോള് സര്ക്കാരിനെ നേരിട്ട് അതൃപ്തി അറിയിച്ചു. പദ്ധതിയില് നിന്നും പിന്മാറാനുള്ള സന്നദ്ധതയും സര്ക്കാരിനെ അറിയിച്ചു. ഇതോടെ മുഖ്യമന്ത്രി പിണറായി വിജയന്റെ നിര്ദേശത്തില് ചീഫ് സെക്രട്ടറി എ. ജയതിലക് ചര്ച്ച നടത്തി. ആറുമാസത്തെ സമയപരിധി നല്കി. എന്നിട്ടും പദ്ധതിചലിപ്പിക്കാന് ഇതുവരെയും ഒരു കടലാസുപോലും നീക്കിയിട്ടില്ല.
‘സമ്പൂര്ണ മാലിന്യമുക്ത കേരളം’ കൊട്ടിഘോഷിച്ചു പ്രഖ്യാപിക്കുമ്പോഴാണ് ഒരു ബാധ്യതയുമില്ലാതെ 2200 കോടിയുടെ പദ്ധതി കേരള സര്ക്കാരിന്റെ അനാസ്ഥയില് നഷ്ടമാകുന്നത്.
