കൊച്ചി: മാരകായുധങ്ങളുമായി ബാറില് ആക്രമണം നടത്തിയ യുവതിയടക്കം മൂന്നു പേര് പിടിയിലായി. ഞായറാഴ്ച വൈറ്റിലയിലെ ബാറിലായിരുന്നു സംഭവം. കൊല്ലം സ്വദേശികളായ ഷഹിന് ഷാ, അല് അമീന്,തിരുവനന്തപുരം സ്വദേശിനി അലീന എന്നിവരെയാണ് മരട് പൊലീസ് അറസ്റ്റ് ചെയ്തത്.
പ്രതികള് മദ്യപിക്കവെ ബാറിലെത്തിയ മറ്റൊരാളുമായി തര്ക്കമുണ്ടായി. ബാര് ജീവനക്കാര് ഇത് ചോദ്യം ചെയ്തതോടെ സംഘര്ഷമായി. തുടര്ന്ന് പുറത്തുപോയ അലീനയും സുഹൃത്തുക്കളും തിരികെ എത്തിയത് വടിവാളുമായി.
സംഘം കാറില്നിന്ന് വടിവാളുമെടുത്ത് ബാറിലേക്ക് വരുന്ന സിസിടിവി ദൃശ്യങ്ങള് പുറത്തുവന്നു. വടിവാള് കൊണ്ടുവന്ന തിരുവനന്തപുരം സ്വദേശി വൈഷ്ണവ് ഒളിവിലാണ്. ആക്രമണത്തില് ബാര് ജീവനക്കാര്ക്കും മര്ദനമേറ്റിരുന്നു.
ബാറില് നിന്ന് പോയ ശേഷം അഞ്ചു തവണ പ്രതികള് മടങ്ങി വന്ന് ആക്രമണം നടത്തിയെന്നും ജീവനക്കാരെ മര്ദിച്ചെന്നുമാണ് ബാര് ഉടമ നല്കിയ പരാതി. വിദ്യാഭ്യാസ ആവശ്യങ്ങള്ക്ക് വേണ്ടി എറണാകുളത്ത് എത്തിയവരാണ് അക്രമികളെന്നാണ് വിവരം. സംഘര്ഷത്തില് യുവതിയുടെ കൈക്ക് പരിക്കേറ്റിരുന്നു.
