കോട്ടയം: വിനോദയാത്രയ്ക്കിടെ വാഹനാപകടങ്ങള് ഉണ്ടായാല് അതിന്റെ പൂര്ണ്ണ ഉത്തരവാദിത്വം അതത് വിദ്യാഭ്യാസ സ്ഥാപന മേധാവിക്കായിരിക്കുമെന്ന മോട്ടോര് വാഹന വകുപ്പിന്റെ അറിയിപ്പില് അവ്യക്തത. സ്കൂളുകളില് നിന്നുള്ള വിനോദയാത്രകള് വേണ്ടെന്നുവയ്ക്കാന് പ്രേരിപ്പിക്കുംവിധം വിദ്യാഭ്യാസ സ്ഥാപന മേധാവികളെ ആശങ്കപ്പെടുത്തുന്ന ഈ അറിയിപ്പില് വ്യക്തത വരുത്തണമെന്നാണ് ഉയരുന്ന ആവശ്യം. മുന്നറിയിപ്പ് നിയമപരമോ എന്ന സംശയവുമുണ്ട്.
സ്കൂളില്നിന്നോ കോളേജില്നിന്നോ വിനോദയാത്ര പോകുന്നത് മുന്കൂട്ടി ബന്ധപ്പെട്ട ആര്ടിഒയെ അറിയിക്കണമെന്ന നിലവിലുള്ള നിര്ദേശത്തെ എല്ലാവരും സ്വാഗതം ചെയ്യുന്നു. മോട്ടോര് വാഹന വകുപ്പ് ഉദ്യോഗസ്ഥര്ക്ക് ബസ് പരിശോധിക്കാനും സുരക്ഷ ഉറപ്പാക്കാനും വിദ്യാര്ത്ഥികള്ക്കും ഡ്രൈവര്ക്കും സുരക്ഷാ കാര്യങ്ങളെക്കുറിച്ച് ബോധവത്കരണം നല്കാനും ഇതു ഉപകരിക്കും. എന്നാല് അപകടമുണ്ടായാല് സ്ഥാപനമേധാവി പ്രതിസ്ഥാനത്തുവരുന്നതെങ്ങിനെയെന്നാണ് ഉയരുന്ന സംശയം. അങ്ങിനെയെങ്കില് മോട്ടോര് വാഹനവകുപ്പിന്റെ അനുമതിയോടെ നടത്തുന്ന വിനോദയാത്രയിക്കിടെ അപകടമുണ്ടായാല് അതിന്റെ ഉത്തരവാദിത്വം ബന്ധപ്പെട്ട ആര്.ടി.ഒ ഏറ്റെടുക്കുമോയെന്നും അറിയിപ്പിന്റെ നിയമസാധുതയില് സംശയമുയര്ത്തുന്നവര് ആരായുന്നു.
