തൃശൂര്: സൂപ്പര് ലീഗ് കേരളയില് മലപ്പുറം എഫ്സിയുടെ അപരാജിത കുതപ്പിന് വിരാമം. തൃശൂര് കോര്പ്പറേഷന് സ്റ്റേഡിയത്തില് ആദ്യമായി നടന്ന ഹോം മത്സരത്തില് തൃശൂര് മാജിക് എഫ്സിയാണ് മലപ്പുറത്തിന്റെ കുതിപ്പ് അവസാനിപ്പിച്ചത്. ഒന്നിനെതിരെ രണ്ട് ഗോളുകള്ക്കായിരുന്നു സീസണിലെ ആദ്യ ഹോം മത്സരം തൃശൂര് എഫ്സി സ്വന്തമാക്കിയത്. തൃശൂരിനായി ഇവാന്മാര് കോവിച്ചും ഫായ്സും ലക്ഷ്യം കണ്ടപ്പോള് മലപ്പുറത്തിന്റെ ആശ്വാസ ഗോള് ജോണ് കെന്നഡിയുടെ വകയായിരുന്നു. വിജയത്തോടെ 6 കളിയില് നിന്ന് 13 പോയിന്റുമായി തൃശൂര് എഫ്സി കാലിക്കറ്റ് എഫ്സിയെ മറികടന്ന് ഒന്നാം സ്ഥാനത്തേക്കുയര്ന്നു.
സ്വന്തം തട്ടകത്തില് ആദ്യ മത്സരം കളിക്കാനിറങ്ങിയ തൃശൂര് മാജിക എഫ് സി മൂന്ന് മാറ്റങ്ങളുമായാണ് ഇന്നലെ തൃശൂര് കോര്പ്പറേഷന് സ്റ്റേഡിയത്തില് കളിക്കാനിറങ്ങിയത്. ഗോള് വലയ്ക്ക് മുന്നില് കമാലുദ്ദീന് പകരം ലക്ഷ്മികാന്ത് കട്ടി മണിയും ഡീന് സെലക്കിന് പകരം അലന് ജോണും മാര്കസ് ജോസഫിന് പകരം ഇവാന്മാര് കോവിച്ചും ഇറങ്ങി. മലപ്പുറം എഫ്സി രണ്ട് മാറ്റങ്ങളുമായാണ് ഇറങ്ങിയത്. അലന് സജു, എ. ടോണി എന്നിവര്ക്ക് പകരം ഫസലുറഹ്മാന്, ജിതിന് പ്രകാശ് എന്നിവര് ആദ്യ ഇലവനില് ഇടം പിടിച്ചു.
ഏറെക്കുറെ നിറഞ്ഞ ഗ്യാലറിക്കു മുന്നില് തൃശൂര് എഫ്സി പന്തുതട്ടിയാണ് കളി തുടങ്ങിയത്. കളി തുടങ്ങി ആറ് മിനിറ്റ് പിന്നിടുന്നതിന് മുന്നേ ഇരു ടീമുകളും ഓരോ ഗോള് നേടി. നാലാം മിനിറ്റില് തൃശൂര് മാജിക് എഫ്സിയുടെ ബിബിന് അജയന് വലതു പാര്ശ്വത്തില് നിന്ന് ബോക്സിലേക്ക് നല്കിയ ത്രൂ പാസ് എത്തിയത് ഇവാന് മാര്കോവിച്ചിന്റെ കാലിലേക്ക്. പന്ത് നിലം തൊടും മുന്നേ മാര്കോവിച്ച് തൊടുത്ത ഷോട്ട് മലപ്പുറം ഗോളി മുഹമ്മദ് അസ്ഹറിനെ കീഴടക്കി വലയില് കയറി. എന്നാല് ലീഡ് നേടിയതിന്റെ ആഹ്ലാദത്തിന് ഒരു മിനിറ്റിന്റെ ആയുസ്സേ ഉണ്ടായുള്ളൂ. മൈതാനമധ്യത്തില് നിന്ന് നീട്ടിക്കിട്ടിയ പന്ത് പിടിച്ചെടുത്ത് ഒന്ന് മുന്നോട്ട് കുതിച്ച ശേഷം മലപ്പുറത്തിന്റെ ജോണ് കെന്നഡി ബോക്സിന് പുറത്തു നിന്ന് രണ്ട് പ്രതിരോധനിരക്കാര്ക്കിടയിലൂടെ തൊട
ത്ത കിടിലന് ഷോട്ട് ലക്ഷ്മികാന്ത് കട്ടി മണിയെ കാഴ്ചക്കാരനാക്കി പോസ്റ്റിന്റെ വലതു മൂലയില് തറച്ചു കയറി. പിന്നിട് 20, 21 മിനിറ്റുകളില് ലീഡ് നേടാന് തൃശൂരിന് രണ്ട് അവസരങ്ങള് ലഭിച്ചെങ്കിലും മുതലാക്കാനായില്ല. ഇരുപത്തിയേഴാം മിനിറ്റില് ആരാധകരെ ആവേശത്തിലാക്കി ആതിഥേയര് ലീഡ് നേടി. ബിബിന് അജയന് ബോക്സിലേക്ക് നല്കിയ പാസ് ഏറെക്കുറെ അസാധ്യമായ ആംഗ്ലിലില് നിന്ന് നല്ലൊരു ഹെഡറിലൂടെ ഫായ്സ് മലപ്പുറം വലകുലുക്കി. തുടര്ന്ന് സമനില ഗോളിനായി മലപ്പുറം കിണഞ്ഞ് ശ്രമിച്ചെങ്കിലും തൃശൂര് പ്രതിരോധവും ഗോളി കട്ടി മണിയെയും കീഴടക്കാനായില്ല.
മൂന്ന് മാറ്റങ്ങളുമായാണ് മലപ്പുറം രണ്ടാം പകുതി തുടങ്ങിയത്. അഖില് പ്രവീണ്, ഇഷാന് പണ്ഡിത, അബ്ദുല് ഹക്കു എന്നിവര് കളത്തിലിറങ്ങി. അറുപതാം മിനിറ്റില് മലപ്പുറം ക്യാപ്റ്റന് എയ്റ്റര് ആല്ഡലിര് പരിക്കേറ്റ് മടങ്ങി. പകരമെത്തിയത് സ്പാനിഷ് താരം ഫക്കുണ്ടോ ബല്ലാര്ഡോ. കോര്ണര് ബോളില് ഹക്കുവിന്റെ ഹെഡ്ഡര് തൃശൂര് ഗോള്കീപ്പര് കട്ടിമണി തടുത്തിട്ടതിന് പിന്നാലെ ആതിഥേയര്ക്കായി ഫ്രാന്സിസ് അഡോ പകരക്കാരനായി വന്നു. രണ്ടാം പകുതിയില് ആധിപത്യം നേടാന് മലപ്പുറത്തിന് കഴിഞ്ഞെങ്കിലും സമനില ഗോള് നേടാന് കഴിഞ്ഞില്ല. നിരവധി അവസരങ്ങളാണ് അവര് പാഴാക്കിയത്. പിന്നീടും മികച്ച മുന്നേറ്റങ്ങള് നടത്തിയെങ്കിലും സമനില ഗോള് വിട്ടുനിന്നു. എണ്പതാം മിനിറ്റില് തൃശൂരിന് അവസരം. എന്നാല് മുഹമ്മദ് അഫ്സലിന്റെ ഇടം കാല്ഷോട്ട് മലപ്പുറം ഗോളി രക്ഷപ്പെടുത്തി. അവസാന മിനിറ്റുകളിലും രണ്ട് ടീമിനും ചില അവസരങ്ങള് ലഭിച്ചെങ്കിലും കൂടുതല് ഗോള് പിറന്നില്ല. ഇതോടെ ആദ്യ ഹോം മത്സരം ഒന്നിനെതിരെ രണ്ട് ഗോളിന് തൃശൂര് എഫ് സിക്ക് സ്വന്തം.. ഇതോടെ മലപ്പുറത്ത് നടന്ന കളിയിലേറ്റ തോല്വിക്ക് പകരം വീട്ടാനും തൃശൂരിനായി.
ജന്മഭൂമി ഓണ്ലൈന്