ലൗ ജിഹാദും വോക്കിസവും
ലൗ ജിഹാദ് അടക്കമുള്ള വിഷയങ്ങള് നേരിടണമെങ്കില് വീട്ടിനുള്ളില് സംസ്കാരങ്ങള് ശക്തിപ്പെടുത്തുന്നതില് ശ്രദ്ധ കേന്ദ്രീകരിക്കണം. എല്ലാ മുസ്ലീങ്ങളെയും ഒരു ബ്രാക്കറ്റില് ഉള്പ്പെടുത്തരുത്. പല മുസ്ലീങ്ങളും അത്തരം പ്രവൃത്തികളെ അംഗീകരിക്കുന്നില്ല. മുസ്ലീം സമൂഹവും സ്വന്തം സമുദായത്തിലെ അംഗങ്ങളെ ബോധവത്കരിക്കണം. ആരെയും മതം മാറ്റാനോ ഒരു സമൂഹത്തെയും വിഭജിക്കാനോ നമ്മള് ആഗ്രഹിക്കുന്നില്ല, പക്ഷേ നമ്മുടെ വീട് ശക്തമായി നിലനില്ക്കണം.
വിദ്യാഭ്യാസത്തിലടക്കം നമുക്ക് നമ്മുടെ സംവിധാനങ്ങളെ ശക്തിപ്പെടുത്തേണ്ടതുണ്ട്. ഇടതുപക്ഷത്തിന് പ്രത്യയശാസ്ത്രം നഷ്ടപ്പെട്ടു; ഇപ്പോള് അത് അധികാര രാഷ്ട്രീയം മാത്രമാണ്. വോക്കിസം പോലുള്ള അന്യഗ്രഹ പ്രത്യയശാസ്ത്രങ്ങള്ക്കെതിരെ അവബോധം സൃഷ്ടിക്കാന് ബൗദ്ധികമായ പോരാട്ടം വേണം. ഭാരതീയ മൂല്യങ്ങള് ലോകത്താകെയെത്തിക്കാന് സംന്യാസിമാര്ക്കും സംഘടനകള്ക്കും ഇടയില് പരസ്പരധാരണയോടെയുള്ള പ്രവര്ത്തനം ആവശ്യമാണ്.
രാഷ്ട്രീയവും സംഘവും
സംഘം എന്നും നയങ്ങളെ, നിലപാടുകളെയാണ് പിന്തുണയ്ക്കുന്നത്. ഉദാഹരണത്തിന് ശ്രീരാമജന്മഭൂമി പ്രസ്ഥാനത്തിന്റെയും രാമക്ഷേത്രത്തിന്റെയും കാര്യത്തില് സംഘം രാഷ്ട്രനീതിക്കൊപ്പമായിരുന്നു, രാഷ്ട്രീയ, ഭരണനീതിക്കൊപ്പമായിരുന്നില്ല. ഭാരതത്തിന്റെ ക്ഷേമത്തിനായി പ്രവര്ത്തിക്കുന്ന എല്ലാ പാര്ട്ടികളെയും സംഘം പിന്തുണയ്ക്കുന്നു. സംഘം എല്ലാവരെയും ഒന്നിപ്പിക്കുന്ന പ്രവര്ത്തനത്തിലാണ് ഏര്പ്പെട്ടിരിക്കുന്നത്. എല്ലാ രാഷ്ട്രീയ പാര്ട്ടികള്ക്കും വ്യത്യസ്ത അഭിപ്രായങ്ങളുണ്ടെങ്കിലും ഒരേ ദേശീയ ലക്ഷ്യത്തിനായി സത്യസന്ധമായി പ്രവര്ത്തിക്കണമെന്ന് അദ്ദേഹം പറഞ്ഞു. നല്ല രാഷ്ട്രീയം ഒരു നല്ല സമൂഹത്തിലൂടെ മാത്രമേ സാധ്യമാകൂ. മനസ്സില് നിന്നാണ് അഴിമതി ആരംഭിക്കുന്നത്. സംസ്കാരങ്ങളുടെയും സാമൂഹിക അന്തരീക്ഷത്തിന്റെയും ഉത്പന്നമെന്ന നിലയിലാണ് സത്യസന്ധത സ്വഭാവമായി രൂപപ്പെടുന്നത്.
പാകിസ്ഥാനും സമാധാനവും
പാകിസ്ഥാനുമായി സമാധാനത്തിനുള്ള വഴി, നാം പാകിസ്ഥാനോട് സമാധാനം തേടുക എന്നതല്ല, മറിച്ച് പാകിസ്ഥാനാണ് അതിന് ശ്രമിക്കേണ്ടത്. നമ്മോട് യുദ്ധത്തിന് വന്നപ്പോഴൊക്ക അവര് പരാജയപ്പെട്ടിട്ടുണ്ട്. 1971ല് അവരുടെ മുഴുവന് സൈന്യവും ഭാരതത്തിനോട് അടിയറവ് പറഞ്ഞു. യുദ്ധമല്ല, സഹകരണമാണ് നല്ലതെന്ന പാഠം പാകിസ്ഥാന് പഠിക്കും. അവര്ക്ക് വേറെ ഏതെങ്കിലും ഭാഷ മനസിലാകുമെന്ന് ഞാന് വിചാരിക്കുന്നില്ല. അപ്പോള് അവര്ക്ക് മനസ്സിലാകുന്ന ഭാഷയില് നാം പറയണം. ഭാരതത്തിനെതിരെ അവര്ക്ക് ഒന്നും ചെയ്യാന് കഴിയില്ല, സത്യസന്ധമായ സൗഹൃദം സൂക്ഷിക്കുന്നതാണ് നല്ലത് എന്ന് അവര് മനസ്സിലാക്കണം. അതാണ് അവര്ക്ക് മനസ്സിലാകുന്ന ഒരേ ഒരു വഴി. അവരുടെ നിരന്തരമായ ആക്രമണങ്ങളെ നാം എപ്പോഴും കരുതിയിരിക്കുക. എപ്പോഴും പരാജയപ്പെടുത്തുക. ഓരോ സമയത്തും അവര്ക്ക് നഷ്ടം വരുത്തുക. അങ്ങനെ പോയാല് പാകിസ്ഥാന് ഒരു ദിവസം മനസ്സിലാക്കും. അവര് നമ്മുടെ സമാധാനക്കാരനായ അയല്ക്കാരന് ആകും. നമ്മുടെ പുരോഗതിക്കനുസരിച്ച് നാം അവര്ക്കും പുരോഗതി നേടിക്കൊടുക്കും.
ചൈനയുമായുള്ള വിഷയത്തില് നമ്മുടെ പരമാധികാരം സംരക്ഷിക്കേണ്ടതുണ്ട്. എല്ലാവരുമായും സൗഹൃദം നമുക്ക് വേണം. എന്നാല് അതിന്റെ അര്ത്ഥം പരമാധികാരം ബലികഴിക്കണമെന്നല്ല. ശക്തമായ ഒരു ഭാരതത്തെ ദഹിപ്പിക്കാന് അവര്ക്ക് കഴിയില്ല.
ലിംഗസമത്വം ശാക്തീകരണം
സംഘത്തില് ഒരുതരത്തിലുള്ള ലിംഗവിവേചനവുമില്ല. ഭാരതമാതാവിന് പ്രണാമം അര്പ്പിക്കുന്ന ആരെയും സംഘം സ്വാഗതം ചെയ്യുന്നു. സ്ത്രീകള് എന്നും സംഘത്തിന്റെ ഭാഗമാണ്. 1933 മുതല് രാഷ്ട്ര സേവികാസമിതി വഴി സ്ത്രീകള് പ്രവര്ത്തിക്കുന്നുണ്ട്. ദൈനംദിന ശാഖയിലൊഴികെ സേവ, മഹിളാസമന്വയം തുടങ്ങിയ മറ്റ് സംഘ പ്രവര്ത്തനങ്ങളിലെല്ലാം പുരുഷന്മാരും സ്ത്രീകളും ഒരുമിച്ചാണ് പ്രവര്ത്തിക്കുന്നത്. പുരുഷന്മാരും സ്ത്രീകളും ബുദ്ധിപരമായും മാനസികമായും തുല്യരും പരസ്പര പൂരകങ്ങളുമാണ്. സ്ത്രീ പങ്കാളിത്തമില്ലാതെ, ഭാരതത്തിന്റെ വിമോചനം അസാധ്യമാണെന്നും അമ്മയാണ് ആദ്യ അദ്ധ്യാപികയെന്നും സ്വാമി വിവേകാനന്ദന് പറഞ്ഞിട്ടുണ്ട്.
